२०८१ आषाढ ५, बुधबार

यलया स्कूलय् मातृभाषा ब्वंकेत माग

बुखँ श्रोत : राजेन्द्र रञ्जित | तछलागा त्रयोदशि ११३७ (जुन २२ २०१७)

नेवाः बस्ती नेवाः स्कुल अभियानया पुचलं यल महानगरपालिका मेयर चिरिबाबु महर्जनयात नापलानाः यलया दक्वं निजी, गुथि व सरकारी स्कूलय् नेपाल भाषा ब्वंकेत इनाप याःगु दु ।
 
अभियानया पुचलं यलया मेयर महर्जनया लिसें उप–मेयर मयजु गीता सत्यालयात नं नापलानाः यलया दक्वं स्कूलय् मातृभाषा नेपालभाषा नं ब्वंकेत माग यासें भिन्तुना पौ नं लःल्हाःगु खः । भिन्तुना पौ लःल्हायेत नेपालभाषा ब्वंकाच्वंगु थीथी स्कूल लिसें यलया भाषिक संस्थात दुथ्याःगु पुचः थ्यंगु खः ।
 
वर्तमान संविधानय् माध्यम कथं मांभाषं ब्वंकेत बियातःगु अधिकारयात कार्यान्वयन यानाः थुगु हे  शैक्षिक दँनिसें मेमेगु विषय सरह दरबन्दी लाकाः नेपालभाषा विषय ब्वंकेत इनाप याःगु खः । लिसें पुचलं आवश्यक थासय् नेपालभाषा माध्यमं नं ब्वंकेत इनाप याःगु खः ।  
 
सरकारया पाठ्यक्रमय्नं विषयकथं अंग्रेजी व नेपाली विषयलिसें मातृभाषा छगूनं ब्वंके माःगु प्रावधान दु 
 
उगु इलय् अभियानया कजि दिपक तुलाधरं मेयर व उपमेयरयात निजी पहलय् १०१स्कूलय् नेपालभाषां ब्वंकाच्वंगु जानकारी याकादीगु खः । 
 
तुलाधरं मांभाषं ब्वनेगु मस्तयगु नैसर्गिक अधिकार जक मखसें जनचाहना खः धासें यल महानगरपालिकाया पहलं स्कूलय् नेपालभाषा ब्वंकेगु नीति न्ह्याकायंकूसा नेपालभाषा संरक्षण जुइगु धयादिल ।
 
थःगु खँ तयेगु झ्वलय् मेयर महर्जनं इलय्ब्यलय् सहलह ब्याकावनेगु बचं ब्युसें महानगरय् अप्वः छ्यलाबुलाय् वइगु निवेदनया फारम नेपालभासं छापेयाकेगु धयादीगु खः ।
 
अभियानया कजि दिपक तुलाधरया नेतृत्वय् वंगु डेलिगेसन पुचलय् नेवाः बस्ती नेवाः स्कूल यलया सुरेश प्रधान, नेपालभाषा मंकाः खलः यलया नायः ऋषि प्रसाद श्रेष्ठ, सल्लाहकार डा. पुष्पराज राजकर्णिकार, ज्यापु समाज यलया नायः प्रेम महर्जनया नं लिसेंया ल्हाःचिं तयाः भिन्तुना पौ लःल्हाःगु खः । 
 
भिन्तुना पतिइ यल नेवाः ईन्टरनेशनल स्कूलया प्रिन्सिपल ध्रुव प्रधान, रेणुका बज्राचार्य, नेपालभाषा केन्द्रिय विभागया पूर्व नायः तुलसीलाल सिं, मांभाय् पुचः यलया नायः हेरारत्न शाक्य, मातृभाषा शिक्षा अनुसन्धाता तोयानाथ भट्टराईया लिसें नेपाल भाषाया न्हिपौ झीगु स्वनिगःया राजेन्द्र रञ्जितया नं ल्हाःचिं दुगु खः ।
Categorized in राष्ट्रिय