यलय् अतिरुद्राभिषेक पूजा न्ह्यानाच्वन
शोभा श्रेष्ठ | चिल्लागा नवमी ११४०
देशय् शान्ति व देशवासीया भिंउसाँय् अले ताःआयूया कामना यासें यलया क्वन्ति महाःद्यःयाथय् अतिरुद्राभिषेक पूजा न्ह्याःगु दु ।
वंगु चैत्र १ गतेनिसें न्ह्याःगु थुगु रुद्राभिषेक पूजाय् हरेक सुथय् २४ राजोपाध्याय द्यःब्रम्हूपिनिगुपाखें पाठ जुयाच्वंगु खः । उकीमध्ये २२ द्यःबाज्यापिन्सं रुद्रि पाठ यायेगु यानाच्वंगु दुसा छम्हेसिनं दुर्गा सप्तसती चण्डी पाठ व छम्हेसिनं पान्चायण पाठ याइ ।
थुगु रुद्राभिषेक पूजा चैत्र महिनान्यंक जुइ । हरेक सुथय् ६ः३०ताः इलंनिसें ९ताः ईतक्क पूजापाठ जुइगु धाःगु दु ।
यलय् ४१ दँ लिपा थथे अतिरुद्राभिषेक पूजा याःगु खः । थ्वयां न्ह्यः यलय् वि.सं. २०३५ सालय् रुद्राभिषेक पूजा याःगु खः ।
हलिंन्यंक कोरोना भाइरस कोभिड १९या ग्याःचिकु न्यनाच्वंगु इलय् यलय् देशवासीया ताःआयू व भिंउसाँय्या कामना यासें अतिरुद्राभिषेक याःगु खः ।
लघुरुद्रि, महारुद्रि लिसेंया रुद्राभिषेक मध्ये अतिरुद्राभिषेकयात दक्कले बांलाःगु कथं काइ ।
Categorized in राष्ट्रिय
