यलय् छम्ह नाप थौं ४२१म्ह कोरोना संक्रमण पुष्टि
लहनान्युज | तछलागा आमै ११४०,असार ७ आइतवाः
वःगु २४ घण्टाय् ४२१म्हेसित कोरोना भाइरस (कोभिड–१९) या संक्रमण पुष्टि जूगु दु ।
थ्व नाप आःतक संक्रमितपि गूद्धः व २६म्ह थ्यःगु दु । उकि मध्ये २३म्ह सी धूकुगु दु सा १७७२म्ह डिस्चार्ज जुइ धुकुगु दु ।
वःगु २४ घण्टाय् १९४म्ह डिस्चार्ज जुइ धुकुगु दु धका स्वास्थ्य तथा जनसंख्या मन्त्रालयं धाःगु दु ।
मन्त्रालयं बिःगु जानकारी कथं थौं अर्घाखाँचीइ ७४म्ह संक्रमित जुगु दु । अथेहे सिराहाय् ५२म्ह, डडेलधुराय् ४१म्ह, डोटी व कैलालीइ २७म्ह व २७म्ह, कपिलवस्तुइ २५म्ह, बाग्लुङय् २३म्ह, नवलपरासीइ २२म्ह, प्युठानय् २०म्ह नाप स्याङ्जा व दाङका झीम्ह झीम्हसित कोरोना संक्रमण पुष्टि जुइ धुकुगु दु ।
अथेहे, धनुषाय् ८म्ह, गुल्मीइ ७म्ह, झापा व सल्यानय् खुम्ह खुम्ह, उदयपुर, सर्लाहीका न्याम्ह न्याम्ह, पाल्पा, म्याग्दी, तनहुँ व रोल्पाय् प्यम्ह प्यम्ह, बारा व बर्दियाय् स्वम्ह स्वम्ह, मोरङ, सुनसरी, महोत्तरी, सप्तरी, सुर्खेत, अछाम, बैतडी, बझाङ, रुपन्देही, नवलपुर व पर्वतय् निम्ह निम्ह संक्रमण पुष्टि जूगु दु ।
अथेतु, यल, नुवाकोट, रामेछाप, कास्की, मुस्ताङ, बाँके, दैलेख व कञ्चनपुरय् छम्ह छम्हेसित कोरोना संक्रमित जूगु दु ।
