यलय् शंखधर शाख्वाःया इतिहासबारे चित्रकला प्रदर्शनी
राजेश बज्राचार्य | ने.सं. ११३७ कौलागा अमाइ (१९ अक्टुबर २०१७) यल
नेपाल सम्वत न्हूदँ ११३८या लसताय् बौद्ध युवा कमिटीं राष्ट्रिय विभूति शंखधर साख्वाः सम्बन्धित छन्हूया ऐतिहासिक चित्रकला प्रदर्शनी व भिन्तुना कालबिल ज्याझ्वः याःगु दु ।
यल लाय्कूलिइ दुने केशव नारायण चुकय् न्ह्याःगु थुगु ज्याझ्वःसं यल महानगरपालिकाया कार्यवाहक प्रमुख उपमेयर गीता सत्यालजु मू पाहाँ जुया झायदीगु खः । युवातयेगु थुजोगु ज्याझ्वःपाखें प्रभावित जुया वयेकलं युवापिनिगु सक्रियतापाखें हे नेपाःया मौलिक संस्कृति व सभ्यता ल्यनिगुलिइ बः बियादिल ।
महानगरपालिकापाखें युवातयेगु शीप विकासय् ग्वाहाली यायेत तयार जूगु न्ह्यथंसे वयेकलं धयादि, “युवापिं न्हिन्हिथं विदेश वनेगु व अंग्रेजी भाय्यात जक प्राथमिकता तया थःगु मौलिकता तनावंगु थ्व ईलय् नेपाःया सभ्यता व मौलिक सम्वतया प्रवर्तक शंखधर शाख्वाया इतिहास कनेत याःगु चित्रकला ब्वज्या अतिकं च्वछाये बहः जु । थुज्वगु ज्यापाखें स्थानीय युवापिनिगु मौलिक शीप विकास व स्वरोजगार उप्वकेयेत महानगरपालिका सदैव तत्पर दु ।”
बौद्ध युवा कमिटीया नवनियुक्त नायो सतिस शाक्यया सभापतित्वय् जूगु थुगु ज्याझ्वःसं संस्कृतिकःमी लोकरत्न शाक्यजुं नेवाःतयेसं म्हःपूजाय् छय्लिइगु मन्दया सामाग्री व आध्यात्मिक पक्षबारे ध्वाःथुइकादीगु खः ।
ज्याझ्वःसं बौद्ध युवा कमिटीया पूलाम्हः नायो सुनील महर्जनजुं युवातयेत धर्म, शीपविकास व बौद्धिक विकासय् कमिटीया योगदान न्ह्यब्वसें जनप्रतिनिधि वयेधुंकाः यलया सवालय् राष्ट्रिय युवा नीति कार्यान्वयन व राज्यपाखें ग्वाहाली कायेत प्रशासनिक रुपं सहज जुइगु वातावरण आवश्यक जूगु न्ह्यथनादिल ।
शंखधरया प्रचलित बाखँया आधारय् न्ह्यब्वयातःगु चित्रकला प्रदर्शनीयात काष्ठमण्डप आर्ट स्टूडियोया प्रशिक्षक प्रमिला बज्राचार्य लगायत वयेकया विद्यार्थीपिनिसं ग्वाहाली याःगु खः । छन्हूया नितिं जूगु चित्रकला ब्वज्यानापं म्हःपूजाया सामाग्री, मन्द सहित प्रदर्शनी अवलोकनय् वःपि स्वदेशी व विदेशीपिनित ध्वाथुइकेगु व इच्छुकपिनित मन्द न्ह्योनेच्वना फोटो कायेकेगु व्यवस्था यानातःगु खः । अथेहे, नेपाःमिपिनिगु मौलिक लिपि रञ्जनालिपिया महत्व ध्वाथुइकेकथं ईच्छूकपिनित रञ्जनालिपिं नेपाल सम्वत ११३८ न्हूदँया भिन्तुना च्वये सयेकेगु व्यवस्था नं याःगु खः ।
कमिटीया छ्याञ्जे प्रनिता शाक्यजुं न्ह्याःकादीगु थुगु ज्याझ्वलय् कमिटीया निवर्तमान नायो अनिल महर्जन, ललितपुर उद्योग बाणिज्य संघया पूर्व नायो अजरमान जोशी, राष्ट्रिय युवा महासंघ यल कचा लगायत थीथी युवा व धार्मिक संघसंस्थाया प्रतिनिधिपिनिगु सहभागिता दुगु खः ।
