यल मनपा २९ वडां २९ म्हसित ब्यक्तिगत क्षमता अभिबृद्धि तालिम
लहना न्यूज | सिल्लाथ्व दुतीया ११४६, माघ ६ मंगलवाः
ललितपुर महानगरपालिका २९ वडां वडाया थीथी महिला समूहया पदाधिकारी व दुजःपिनिगु क्षमता अभिबृद्धि यायेगु तातुनां ग्वसाः ग्वःगु उद्घोषण व ब्यक्तिगत क्षमता अभिबृद्धि तालिम क्वचाःगु दु । तालिमया समापन समारोहया मूपाहां वडाया महिला सदस्य मनमाया महर्जनं तालिमय् ब्वति कयादीपिन्त दसिपौ लःल्हानादिसें सकसिगु क्षमता अभिबृद्धि जूगु खनां थःगु नुगः लसतां जाःगु खँ कनादिल ।
थुगु ज्याझ्वलय् प्रशिक्षक सुरजवीर बज्राचार्ययात दोसल्लां न्ययेकाः मतिनाया चिं व हनापौ देछासें हंगु खः । वयकलं प्रशिक्षार्थीपिं आः थःगु समूह व समुदायय् वनाः ज्याझ्वः ग्वसाः ग्वयेगु, न्ह्याकेगु व अतिकं बांलाक ज्याझ्वः ब्यवस्थापन यायेत अःपुइगु आशा प्वंकादिल । ह्वःता छुं नं मत्वःतेत सयेकादीपिन्त इनाप यानादीम्ह प्रशिक्षक बज्राचार्यं माःगु इलय् थः सदां नं ग्वाहालि नितिं नाप दइगु प्रतिवद्धता नं प्वंकादिल ।
पाठशाला प्रशिक्षण केन्द्रया संयोजनय् २९ म्हसिनं ब्वति कयादीगु थुगु तालिमया समापन समारोहय् प्रशिक्षार्थीपिं रजनी महर्जन, राज्यलक्ष्मी महर्जन, ममिता महर्जन, ज्ञानु दुलाल, शान्ति घिमिरे, विमला खड्गी, लिला महर्जन, मोनिका रुम्जाली गुरुङं पालंपाः ज्याझ्वः न्ह्याकादिलसा सयेकादीगु पुचःया हे प्रमिला महर्जनं सभापतिया आशन ग्रहण यानादीगु खः । प्रशिक्षार्थी धनलक्ष्मी महर्जनं लसकुस न्वचु, प्रशिक्षार्थी मञ्जुश्री महर्जनं सुभाय् न्वचु प्वंकादीगु थुगु समापन समारोहय् केन्द्रका पुकार पुतुवार र युनिश महर्जनयात नं सुभायपाै देछाःगु खः ।
समापन समारोहय् यमुतरी महर्जन, अञ्जु महर्जन, राधिका महर्जन, सानुकुमारी महर्जन, रविना तुलाधरले राष्ट्रिय गान हालादीगु खःसा पाँचकन्या महर्जनं लसकुस म्ये हालादीगु खः ।
प्रशिक्षार्थीपिं निला महर्जन, दुर्गालक्ष्मी महर्जन, अञ्जु महर्जन, यशोदा न्यौपाने, पाँचकन्या महर्जन, यमुतरी महर्जन, राधिका महर्जन, अरुणा महर्जन, सानुकुमारी महर्जन, रविना तुलाधर, राज्यलक्ष्मी महर्जन, प्रमिला महर्जन, ज्ञानी महर्जन, सल्मा नापित, शर्मिला तिमल्सिना, शान्ति महर्जन, सम्झना राईपिन्सं थःगु अनुभव कनादीगु खः । वय्कःपिन्सं प्रशिक्षणं थःपिं अतिकं उत्साहित जूगु खँ न्ह्यथंसें स्यनामि, समयन्वय याःगु केन्द्र व वडा परिवारयात सुभाय् देछानादीगु खः ।
