यल महानगरपालिकाया आर्थिक वर्ष २०७६/७७ या नितिं ५गू अर्ब ३१गू करोड ४३गू लख ५७द्वः तकाया बजेट पारित याःगु दु ।

 

महानगरया म्हिगः मंगलवाः च्वंगु प्यक्वःगु नगरसभापाखें पूर्वाधार, मूर्त व अमूर्त सम्पदा संरक्षण, हरियाली संरक्षणलिसेयात प्राथमिकताय् तयाः उगु बजेट पास याःगु खः ।

 

पूर्वाधार निर्माण व हरियाली प्रबद्र्धन प्राथमिकताय् तःगु महानगरपालिकाया प्रमुख चिरीबाबु महर्जनं धयादीगु दु । महानगरया हरेका वडायात विकास सूचांकया लिधंसाय् स्वंगू कथं वर्गिकरण यानाः बजेट फ्याःगु खः । गुकी मध्ये न्हापांगु वर्गय् लाःगु वडा ल्याः १, ६, ७, ८, १०, ११ व १९य् १गू करोड ६५गू लखतका बजेट विनियोजन याःगु दु । निगूगु वर्गय् लाःगु वडा ल्याः २, ३, ४, ५, ९, १३, १४, १५ व १७ य् २गू करोडतका व स्वंगूगु वर्गय् लाःगु वडा ल्याः १२, १६, १८, २०, २१, २२, २३, २४, २५, २६, २७, २८ व २९यात २गू करोड ७५गू लखतका बजेट फ्याःगु दु ।

 

महानगरया फुक्क वडाया विकास समान गतिइ मजूगुलिं वर्गीकरण यानाः विकास खर्च बजेट फ्यानागु महानगर प्रमुख महर्जनं धयादीगु दु ।