यादव अपरहण मुद्दाय् उजुरी हे दर्ता मयाः प्रहरीं
जनता समाजवादी पार्टीया सांसद् सुरेन्द्र यादव अपहरण काण्डय् प्रहरीं जाहेरी दर्ता हे मयाःसे पार्टी नेतातयत लितछ्वयाब्यूगु दु । 
 
दोषियात कारवाहिया माग यासें जाहेरी दर्ता यायेत महानगरीय प्रहरी परिसर, टेकु थ्यंपिं जसपाया नेतातयत प्रहरीं उजुरी हे दर्ता मयाःसे लितछ्वयाब्यूगु खः । 
 
जसपाया शीर्ष नेतात पूर्वप्रधानमन्त्री डा. बाबुराम भट्टराई, पूर्व स्वास्थ्यमन्त्री उपेन्द्र यादव, राजेन्द्र महतो, हिसिला यमि, राजेन्द्र श्रेष्ठ लगायतका नेतातलिसें सांसद सुरेन्द्र यादव थः हे नं जाहेरी दर्ता यायेत टेकुइ थ्यंगु खः ।
 
वयकःपिन्सं सत्तारुढ नेपाल कम्युनिस्ट पार्टी (नेकपा)या सांसदद्वय महेश बस्नेत व किसान श्रेष्ठ अले पूर्व प्रहरी महानिरीक्षक सवेन्द्र खनालविरुद्ध अपहरण अले शरीर बन्धकया जाहेरी दर्ता यायेत धाःगुलिइ महानगरीय प्रहरी परिसरं जाहेरी दर्ता यायेत अस्वीस्कार याःगु खः ।
 
परिसर प्रमुख एसएसपी श्यामलाल ज्ञवालीं जाहेरी दर्ता यायेत अस्वीकार याःगु खः । ज्ञवाली मदुगु इलय् एसपी सोमेन्द्र राठोरं नं दर्ता यायेमज्यूगु धासें जाहेरी कायेत अस्वीकार याःगु खः । थुगु घटना महोत्तरीइ जूगुलिं थःगु क्षेत्राधिकारय् मलाःगु व दर्ता याये हे माःसा महोत्तरीइ हे वनेत प्रहरीं धाःगु खः ।
 
 
परिसरं पिहांवःम्ह पूर्वप्रधानमन्त्री भट्टराईं संचारकःमितलिसे खँ ल्हासें थुगु घटनां देय् गम्भीर संकटपाखें न्ह्याःवंगु धयादिल ।
 
पूर्व आईजीपी खनाल, श्रेष्ठ र बस्नेतं तत्कालीन समाजवादी पार्टी ब्वथलेगु कुतलय् १० वैशाखय् महोत्तरी वनाः सांसद यादवयात येँय् हःगु खः । 
 
येँय् हयाः मेरियट होटलय् तःम्ह सांसद यादव कन्हयकुन्हु सुथय् होटलं बिस्युं वःगु खः । 
 
यादवं थः येँय् वयेमखु धायेक धायेकं नं अपहरणया हे शैलीइ येँय् हःगु धयाच्वंगु दुसा खनाल, श्रेष्ठ व बस्नेतं धाःसा यादवया हे सहमतिइ येँय् हयागु धयावयाच्वंगु दु ।
 
 
Categorized in राजनीति