यादव अपहरण काण्डय् कारवाहीया माग यासें प्रहरीइ उजुरी
पार्टी ब्वथलेत समाजवादी पार्टीया सांसद सुरेन्द्र यादवयात महोत्तरीं येँय् हःगु घटनाय् पार्टीका नेतातयसं प्रहरीइ उजुरी दर्ता याकूगु दु । सांसद यादवयात अपहरण याःगु धासें दोषियात कारवाहीया माग यासें प्रहरीइ उजुरी दर्ता याकूगु खः ।
 
उजुरी दर्ता याकेत पूर्व स्वास्थ्यमन्त्री उपेन्द्र यादव, पूर्वप्रधानमन्त्री डा. बाबुराम भट्टराई लिसें सांसद् डा. सुरेन्द्र यादव थः हे नं अपराध अनुसन्धान महाशाखा टेकुइ थ्यंगु खः ।
 
वयकःपिं लिसें हिसिला यमि, शरदसिं भण्डारी, राजेन्द्र श्रेष्ठ, अशोक राई, राजेन्द्र महतो, आङकाजी शेर्पा लगायतया जनता समाजवादी पार्टीया नेतात टेकु थ्यंगु खः ।
 
डा. यादवयात पार्टी ब्वथलेत अपहरण यानाः हे येँय् हःगु द्वपं उगु पार्टीया नेतातयसं सार्वजनिक रूपं बिया वयाच्वंगु दु । 
 
नेकपाया सांसदद्वय महेश बस्नेत व किसान श्रेष्ठ अले पूर्व प्रहरी महानिरीक्षक सर्वेन्द्र खनाल महोत्तरी वनाः डा. यादवयात बिहीबाः सुथय् येँय् हःगु खः ।
 
तत्कालीन समाजवादी पार्टी ब्वथलेत न्हयम्ह सांसद माःगुलिइ ६ जक जूबलय् थःत प्रलोभन वव दबाबय् लाकाः येँय् हःगु डा. यादवं धाःगु दु । 
 
येँय् वयेत अनिच्छा क्यनाः नं थःत त्व हे मत्वःतुसे येँय् हःगु यादवं धाःगु दु ।
 
वयकःयात येँय् हयाः म्यारियट होटेलय् तःगु खः । सुथय् थः अनं बिस्युं वयागु नं वयकलं धाःगु दु । 
Categorized in राजनीति