युइएफए सुपर कपया उपाधि लिभरपुलयात
लहना न्यूज | ने.सं. ११३९ गुंपुन्हि (१५ अगष्ट, २०१९), विहिवाः
इंग्लिस प्रिमियर क्लब लिभरपुलं युइएफए सुपर कपया उपाधि त्याकूगु दु ।
टर्किया इस्तानबुलय् जूगु कासाया क्वछिनातःगु व थप याःगु ईया कासा २/२गू गोलया बराबरीइ क्वचाःगु खः ।
कासाय् अग्रता धाःसा चेल्सीं हे काःगु खः । ३६गूगु मिनेटय् ओलिभर जिरार्डं अग्रता ब्यूगु खः । तर निगूगु हाफया शुरुइ हे साडिओ मानें लिभरपुलया नितिं बराबरी गोल याःगु खः । क्वःछिनातःगु इलय् निगुलिं पुचःपाखें थप गोल जुइमफुत ।
अतिरिक्त ईया कासाय् मानें हे गोल यासें लिभरपुलयात न्ह्यःने लाकल । तर उकिया ६गूगु मिनेटलिपा चेल्सीया जोर्जिन्हों पेनाल्टीपाखें बराबरी गोल यात । क्वःछिनातःगु व थप याःगु इलय् तक निगुलिं टिमं २/२गू गोलया बराबरी जुइवं कासा टाइब्रेकरय् वंगु खः ।
व लिपा जूगु पेनाल्टी सुटआउटय् लिभरपुल ५–४ या गोलं कासा त्यात । पेनाल्टीइ लिभरपुलया गोलकिपर एड्रियनं चेल्सीया टमी अब्राहमया पेनाल्टीयात पनाब्यूगु खः । टमी न्यागूगु नम्बरय् पेनाल्टी थ्वा वःगु खः ।
थ्व स्वयां न्ह्यः लिभरपुलया नितिं मोहम्मद सलाह, रोबर्टो फिर्मिनो, फाबिन्हो, ओरिगी व अलेक्जेण्डर अर्नोल्डं गोल याःगु खः ।
Categorized in कासा
