युएफा कन्फरेन्स लिगया छनौट कासाय् इंग्ल्याण्डया टोटनह्याम बुत
गुंलाथ्व त्रयोदशी ११४१, भाद्र ४ शुक्रवाः
युएफा कन्फरेन्स लिग फुटबल धेंधेंबल्लाया छनौट चरणय् इंग्ल्याण्डया टोटनह्याम हट्सपर बूगु दु ।
वंगु चान्हय् पोर्चुगलय् जूगु प्ले अफया न्हापांगु लेगया कासाय् टोटनह्यामयात स्थानिय टोली पाकोस डे फरेरां १–०या गोल अन्तरं बुकुगु खः । थुगु कासाय् प्रशिक्षक नुनो इस्पिरितो सान्तों टोटनह्यामया सुरुवाती ११म्हलय् पूवंक हे हिउगु खः ।
थ्वयान्ह्यःया वालय् प्रिमियर लिगय् म्यान्चेस्टर सिटीयात बुकुबलय् म्हितुपिं फुक्क ११म्ह कासामियात थ्वखुसिइ सुरुवाती ११म्हपाखें चिइकुगु खः । कमजोर टोली टोटनह्यामं पोर्चुगलया प्रतिद्धन्दी विरुद्ध कासा ज्वछि छगू नं ‘अन–टार्गेट’ हताः यायेत मफुत ।
कन्फरेन्स लिगया हे मेगु कासाय् इटालीया ए.एस रोमां टर्कीया ट्राबजोन्सपरयात २गू–१गूया गोल अन्तरं बुकल । थुगु हे कासापाखें प्रशिक्षक जोजे मौरिन्हों इटालीयन क्लब रोमाय् डेब्यु याःगु दु ।
वंगु चान्हय् जूगु मेगु कासाय् जर्मनीया युनियन बर्लिन, बेल्जीयमया गेन्ट व इजराईलया मकाबी तेल अभिभ नं त्यागु दु । युएफा कन्फरेन्स लिग फुटबल युरोपेली क्लबतये ३गूगु श्रेणीया धेंधेंबल्ला खः ।
शिर्ष श्रेणीया च्याम्पियन्स लिग व निगूगु श्रेणीया युरोपा लिगलिपा थुगुसिइ निसें ३गूगु श्रेणीया कन्फरेन्स लिग न्ह्यागु खः ।
Categorized in कासा
