२०८१ आषाढ ११, मंगलबार

युक्रेनलिसेया तनाव ज्यनीगु संभावना म्ह्वः जुल : राष्ट्रपति पुटिन

पोहेलागा एकादशी ११४२, माघ १५ शनिबा

रुसया राष्ट्रपति भ्लादिमीर पुटिनं अमेरिकां रुसया सुरक्षा चिन्ताया वेवास्ता याःगु द्वपं बियादीगु दु ।

फ्रान्सया राष्ट्रपति इमानएल म्याक्रोंलिसेया टेलिफोन सम्बादय् पुटिनं युक्रेनयात एटलान्टिक ग्वहालि संगठन नेटों ग्वहालि याःगु गलत धासें अमेरिकां युक्रेनया मामिलाय् कुटनैतिक चाल म्हितूगु द्वपं बियादीगु दु ।

थ्वयां न्ह्यः, अमेरिकी राष्ट्रपति जो बाइडनं रुसं युक्रेनय् हमलाया तयारी याःगु धासें सचेत जुयाच्वनेत युक्रेनलिसें पश्चिमा राष्ट्रतय्त इनाप यानादीगु खः । ह्वाइटहाउसय् सञ्चारकःमितय्त प्रतिक्रिया ब्युसें बाइडनं रुसं युक्रेनय् वइगु फेब्रुअरीइ आक्रमण यायेफुगु चेतावनी बियादीगु खः ।

थ्व हे दथुइ, रुसं तनाव ज्यनीगु सम्भावना तसकं म्ह्वः दुगु धाःगु दु । अमेरिकां थःगु मू माग अस्वीकार याःगुलिं तनाव ज्यनीगु सम्भावना तसकं म्ह्वः जुयावंगु रुसं धाःगु खः । रुसं सैन्य गठबन्धन नेटोय् युक्रेनया प्रवेश बन्देज यायेमाःगु माग याःगु खः ।

तर अमेरिकां व माग स्पष्ट रुपं अस्वीकार याःगु खः । रुसं वंगु छुं वालय् युक्रेनलिसेया सीमा क्षेत्रय् करिब १ लख सैनिक तैनाथ याःगु दु । अमेरिकालिसेंया पश्चिमा राष्ट्रं थुकियात युक्रेनयात रुसी आक्रमणया तयारी धाःगु दु ।

Categorized in अन्तर्राष्ट्रिय