रुसं युक्रेनय् हताः याःसा जर्मनी वनिगु रुसी ग्यास पाइपलाइन बन्द यायेगु ख्याच्वः अमेरिकां बिउगु दु ।

अमेरिकी राष्ट्रपति जो बाइडेनं जर्मन चान्सलर ओलाफ स्कोल्जलिसे वाशिङटनय् सहलह यायेधुंका थुकथं  ख्याच्वः बियादीगु खः ।

नापलायेज्या लिपा पत्रकार सम्मेलन याना राष्ट्रपति बाइडेनं युक्रेन मामिलाय् जर्मनी व अमेरिका छधि जूगु प्रतिक्रिया बिउसें थुगुखँय् बिचार बिमर्स यायेत रुसयात सचेत याकादील ।

थ्वयान्ह्यः फ्रान्सया राष्ट्रपति इमानुएल म्याक्रोनं रुसी राष्ट्रपति भ्लादिमिर पुटिनलिसे मस्कोय् जूगु नापलाय्ज्याया झ्वलय् युक्रेनय् हताः मयायेत इनाप यानादीगु खः ।

रुसं युक्रेनयात हताः याइगु आशंकाय्  पश्चिमा देय्त चिन्तित जूगु दु  । अयेसां रुसं धाःसा युक्रेनयात हताः यायेगु थःपिनि योजना मदूगु धयावःगु दु । तर युक्रेनया  सीमानाय् रुसं छगू लख सिवें अप्वः सेना तैनाथी अवस्थाय् तयेधुंकुगु दु ।

एटलान्टिक सैन्य संगठन नेटोय् युक्रेनयात आवद्ध जुइके मबिइत रुसं सः थनावःगु लिसें पूर्वी युरोपय् नेटोया ल्याः क्वपालेत याःगु माग नेटों अस्वीकार यायेधुंक रुस क्रुद जूगु खः ।

Categorized in अन्तर्राष्ट्रिय