१६औं संस्करणया युरोकप फुटबलया नकआउट झ्वःया कासा थौं निसें न्ह्याइगु जूगु दु । लिपांगु १६गू या थौं निगू कासा जुई । थौं जुइगु न्हापांगु कासाय् वेल्स व डेनमार्क धेँधेँबल्ला जुइसा निगूगु कासा इटाली व अष्ट्रिया दथुई धेँधेँबल्ला जुई । नेदरल्याण्ड्सया जोहान क्रुफ एरिनाय् जुइगु वेल्स व डेनमार्क दथुया कासा थौं बहनि जःछि पाः १० ताः ईलय् जुई । डेनमार्क पुचः बीया ल्यू त्याकुमि जुया लिपांगु राउण्ड अफ १६ थ्यंगु खः । डेनमार्कंया स्वंगु ल्याः जूगु दु । वेल्स पुचः ए या ल्यू त्याकुमि जुया नकआउट वःलय् थ्यंगु खः । वेल्सं ३गू कासां ४गू ल्याः याःगु दु । डेनमार्क वा वेल्स दथुई १०क्वः तक्क कासा जूगु दु । गुकिइ डेनमार्कं खुक्वः व वेल्सं प्यक्वःखुसि त्याकूगु दु । अथेहे ईंग्ल्याण्डया वेम्बली स्टेडियमय् जुइगु इटाली व अष्ट्रिया दथुया कासा थौं चान्ह्य् ११ः४५ जुई । इटाली पुचः ए या त्याकुमि जुया नकआउट वलय् थ्यंगु खः । इटालीं ३गू कासां ९गू ल्याः हःगु दु । अष्ट्रिय धाःसा पुचः सीया ल्यूत्याकुमि जुया नकआउट वलय् थ्यंगु खः । अष्ट्रियां स्वंगु कासां ६गू ल्या हःगु दु । इटाली व अष्ट्रिया दथुई आः तक्क १३गू कासा धेँधेँबल्ला जूगु दु । इटाली अष्ट्रियालिसे बुइमाःगु मदुनि । इटालीं अष्ट्रियाविरुया कासाय् १०गू कासा त्याःगु दु धाःसा ३गू कासा ज्वलिंज्वलय् क्वःचागु खः । Categorized in कासा