युरोकप : क्वाटरफाइनलय कासा थौंनिसें न्ह्याइगु
बछलागा अष्टमी ११४१, असार १८ शुक्रवाः
युरोकप फुटबलया क्वाटरफाइनल कासात थौंनिसें न्ह्यायेत्यंगु दु ।
थौं बहनि ९ ता ई जुया ४५ गू मिनेटय् जुइगु न्हापांगु क्वाटरफाइनल कासाय् स्पेन व स्विट्जरल्याण्ड दथुइ धेंधेंबल्ला जुइ । थुगु कासा रुसया सेन्ट पिटर्सवर्गय् जुइ । राउण्ड अफ सिक्सटिनय् क्रोएसियायात अतिरिक्त इलय् ५–३या गोल अन्तरं बुका स्पेन क्वाटरफाइनलय् थ्यंगु खः ।
स्विटजरल्याण्डं धाःसा प्रि क्वाटरफाइनलय् विश्वकप त्याकामि फ्रान्सयात टाई ब्रेकरय् बुकुगु खः । क्वाटरफाईनलया निगूगु कासाय् थौं चान्हय् १२ ता ई जुया ४५ गू मिनेटय् इटाली व बेल्जीयम दथुइ कासा जुइ ।
थुगु कासा जर्मनीया म्युनिखय् न्ह्याइ । राउण्ड अफ सिक्सटिनय् अष्ट्रियायात बुका इटाली व पोर्चुगलयात बुका बेल्जियम क्वाटरफाइनलय् थ्यंगु खः ।
युरोकपया मेगु निगू क्वाटरफाइनलय् कन्हय् चान्हय् चेक रिपब्लिक व डेनमार्क अले युक्रेन व इंग्ल्याण्ड दथुइ धेंधेंबल्ला जुइ ।
Categorized in कासा
