युरोपियन फुटबलय् कासामि न्यायेमिइगुलिइ झण्डै छगू अर्ब पाउण्ड खर्च
गुंलागा दशमी ११४१, भाद्र १६ बुधबाः
युरोपियन फुटबलय् कासामि न्यायेमिइगुया ई क्वचागु दु । ट्रान्सफर ईया लिपांगु दिं म्हिगः आपालं कासामितये न्यायेमिइगु जूगु दु । स्पेनिस कासामि साउल निग्वेज एथ्लेटिको मड्रिडं ऋण कथं चेल्सी वःगु दु ।
अथेहे बार्सिलोनाया कासामि एन्टोनियो ग्रेजमन हाकनं एथ्लेटिको मड्रिड लिहाँवःगु दु । हलिं फुटबलया हे सर्वकालिन महान कासामि मध्येया छम्ह क्रिश्चियानो रोनाल्डाें थःगु म्यान्चेस्टर युनाईटेड पुनरागमन पूवंकुगु दु ।
पिएसजीया किलियन एम्बाप्पेया रियाल मड्रिड वनेगु म्हगस धाःसा थुगु सिजनया नितिं पूमवन । अथेहे आर्सनलं जापानी डिफेन्डर तोमियासुयात क्लबय् दुथ्याकुबलय् म्यान्चेस्टर युर्नाटेडया ड्यानियल जेम्स लिड्स युनाईटेड थ्यंगु दु ।
थुगु सिजन प्रिमियर क्लबतयेसं कासामि न्यायेमिइगुलिइ छगू अर्ब पाउण्ड सिवें अप्वः खर्च याःगु दु । क्रिश्चियानो रोनाल्डो म्यानचेस्टर युनाईटेडय्, रोमेलु लुकाकु चेल्सीइ व ज्याक ग्रिएलिसया म्यानचेस्टर सिटीइ जूगु आगमनयात सिजनया मू ट्रान्सफरया कथं स्वगु दु ।
