युरोपेली देशय् कोरोनाया ओमिक्रोन भेरियन्ट मि थें न्यनावंगु दु ।

संक्रमणं न्हिं न्हिं न्हून्हूगु रेकर्ड दयेकाच्वंगु दु । फ्रान्सय् मंगलबाः छन्हुं हे १ लख ८०द्वः न्हूपिं संक्रमित लूगु दु । गुगु वंगु शनिबाः १ लख ४द्वः दुगु खः ।

बेलायतय् २४ घौ दुने १ लख २८द्वः स्वयां अप्वः संक्रमित लूगु दु । इटली, ग्रीस, साइप्रसलिसेंया मेगु युरोपेली देशय् नं संक्रमणया गति तच्वःगु दु ।

युरोपय् हे दक्कले अप्वः जनतायात खोप ब्यूगु पोर्चुगलय् नं संक्रमण न्हिं न्हूगु रेकर्ड खनेदु । अथे हे, बेल्जियम, नेदरल्याण्ड व रुसय् नं ओमिक्रोन संक्रमणं मिया रुप काःगु दु ।

उखे, अमेरिकाय् नं संक्रमण परीक्षण याकीपिनिगु अप्वयाच्वंगु लाइनं ओमिक्रोनया संक्रमण गुकथं न्यनाच्वंगु दु धइगु छुमा क्यंगु चारमाध्यमतय्सं न्ह्यथंगु दु ।

अमेरिकी राष्ट्रपति जो बाइडेनं परीक्षणयात अभियानया रुपं न्ह्याकेगु धयादीगु दु ।

Categorized in अन्तर्राष्ट्रिय