युरोपेली देशय् हाकनं धमाधम लकडाउनय्
कछलाथ्व एकादशी ११४२, कार्तिक २९ सोमवाः
विश्व स्वास्थ्य संगठनं युरोप कोरोना संक्रमणया केन्द्र जुइगु ख्याच्वः बिउगु निवा मबिवं युरोपेली देय्त धमाधम लकडाउनय् वनेगु न्ह्यागु दु ।
नेदरल्याण्डं देय्यंक लकडाउन घोषणा याःगु कन्हय्कुन्हु अष्ट्रियां नं लकडाउन घोषणा याःगु दु । तर थ्वखुसिया लकडाउनया प्रकृति धाःसा बिस्कं खनेदत । नेदरल्याण्डं शैक्षिक क्षेत्र, रेष्टुराँ, होटल लिसें अप्वः भिडभाड जुइगु थासय् लकडाउन याःगु दुसा अष्ट्रियां खोप मकाःपिन्त लकडाउनय् तःगु दु ।
अष्ट्रियां खोप मकाःपिन्त मनूतयेत नयेत्वनेगु न्यायेय्गु नितिं सिवं मेगु ज्याय् छेँ नं पिहाँँवयेगुलिइ रोक तःगु दु । अष्ट्रियाय् आः नं ३५गू प्रतिशत जनसंख्यां खोप काःगु मदुनि । लिपांगु छवा दुने संक्रमण दर प्रति लखय् ८सःम्ह थ्यंगु दु ।
खोप मकाःपिन्त छेँय् हे सीमित याइबलय् भीडभाड नं म्हो जुइगु व संक्रमणया जोखिम नं म्हो जुइगु भलसा याःगु दु । खोप काःगु मकाःगु क्वजिइत थाय् थासय् प्रहरीयात चेकजाँच यायेगु अधिकार बिउगु दु ।
उखे, जर्मनीइ नं संक्रमण दर छक्वःलं अप्वयेधुंका वइगु वाये दुने न्हूगु मापदण्ड लागू यायेगु तयारी जुयाच्वंगु दु । नेदरल्याण्डं लकडाउन लाइट नाँ बिया वंगु शनिबाः निसें हे आवागमन व भेटघाटयात चिबाला याःगु दु ।
मेगु युरोपेली देय् बेल्जियमय् नं संक्रमणया दर तसकं अप्वयावनेधुंका अनया सरकारं न्हूगु मापदण्डया विषयलय् सहलह न्ह्याकुगु दु । अथेहे लाट्भियाय् नोभेम्बरया शुरु निसें हे लकडाउन याःगु दु ।
दक्वःलय् न्हापा कोरोना खोप काःगु दाबी याःगु रुसय् दक्वःलय् संक्रमण अप्वःगु दु । रुसया संक्रमणया गतिं स्पुतनिक खोपया प्रभावकारिताय् नं न्ह्यसः थंगु दु ।
Categorized in अन्तर्राष्ट्रिय