२०७७ माघ ५, सोमबार

युवापुस्तायात परिवर्तनकारी राजनितीइ आकर्षण यायेत उम्मेदवारी - प्रविन महर्जन

ने. सं. ११३८ थिंलाथ्व नवमि (नोभेम्वर २७, २०१७) यल
यलया क्षेत्र नं २य् प्रतिनिधिसभा व प्रदेशसभाया निर्वाचन प्रचारय् तीव्रता वःगु दु । थुुगु क्षेत्रया विवेकशील साझा पार्टीपाखें क्षेत्र नं २(क)या प्रदेशसभा युवा उम्मेदवार प्रविन महर्जनजुनापं संवाददाता राजेश बज्राचार्यं  यानादीगु खँल्हाबल्हा संक्षेपय् न्ह्यब्वया ः
 
 
 
थुगुसीया निर्वाचनय् छिगु उम्मेदवारी छाय आवश्यक जुल?
 
प्रविनः  स्थानीय समस्याया समाधान युवापुस्ताया नेतृत्वय् जुइमा धैगु स्थापित यायेत जिगु उम्मेदवारी खः । राजनितीइ यक्वः म्हगसः मिइपिं जक उप्वयाच्वन, व्यवहारिक व थःम्ह फैगु पूवंके फइगु एजेण्डाय् जक क्वात्तुःक ज्या यायेगु आँटपाखें युवापुस्तायात परिवर्तनकारी राजनितीइ आकर्षण यायेत जि चुनावय् न्ह्यज्यानागु खः । जिं ल्ययागु निर्वाचन क्षेत्र यलया मू वस्तीसिबें न्हूगु वस्तीया विकास जुयाच्वंगु इमाडोल, लूभु, लामाटार, टीकाथली लगायतया महालक्ष्मी नगरपालिका क्षेत्र व ललितपुर महानगरपालिकाया वडा नं १७ जक खः । थुगु प्रादेशिक क्षेत्रया उम्मेदवार स्वयादिसँ, सकलें ६५दँ यापिं । थ्व ‘ग्याप’ वाय् गाः यात म्हूइफसा जक न्हूगु विकासया सम्भावना दु धैगु प्रमाणित यायेत जिगु उम्मेदवारी खः । 
जि १८दँ क्यंसानिसें व्यवसाय न्ह्याका उद्यमशीलताया अभ्यास यानाम्ह । नेपाल स्काउट, वन्यजन्तु व पर्यावरण संरक्षणयानितिं ‘फ्रेण्डस् अफ जू’ व ‘रोटराक्ट क्लब’पाखें अर्थपूर्ण सामाजिक सेवाय् निरन्तरता बियाच्वना । थुपिं अनुभवया आधारय् न्हूगु विकासया आयाम बाल्यकालया विकासपाखें जुइ धैगु प्रमाणित यायेत नेपाःया ‘सुनौला १००० दिन’ यात व्यवहारिक जक मखु ६ दँ तकया बाल्यकाल सम्बन्धित जनस्वास्थ्य, व्यवहारिक शिक्षाप्रणालीयात राज्यया दायित्व दुने लाःकेगु व क्षेत्र नं २ (क)यात लागूपदार्थ दूव्र्यसनमुक्त क्षेत्र घोषणापाखें ‘युवा नीति २०७२’यात व्यवहारिक छ्यलाबुलाय् हयेगु जिगु संकल्प खः । समग्रय् ‘युवा न्ह्यज्याइ, देय् च्वःन्ह्याइ’ धैगु प्रतिवद्धता प्रमाणित यायेत साझा विवेकशील पार्टीपाखें जिगु उम्मेदवारी खः ।  
 
 
थौकन्हय् छि चुनावी प्रचारय् व्यस्त खनेदु । घरदैलो अभियानय् झायादीबलय् स्थानीयपिनिगु धापु छु दु? 
 
प्रविन ः क्षेत्र नं २(क) या मुख्य समस्या धैगु पुलाँपिं दल व नेतातयेसं चुनावय् क्यनिगु प्रतिवद्धता सुनानं पूवंकेमफूत ‘हलः हलः फसिक्वाः’ धैथे जुल धैगु तँ हे खनेदु । सिद्धिपुर व लूभु क्षेत्रय लः हे तधंगु समस्या धाःगु दु, खँ ल्हाःत, योजना दयेकल, उपलब्धि न्यून जुयाच्वंगु थनया समस्या खनेदु । ग्वार्कोनिसें लाकुरेभञ्ज्यांग जुया काभ्रेतक स्वाइगु राजमार्गया स्थापना मेगु तधंगु आशा खयानं लूभु लागापाखे ७ बजेलिपा सुरक्षित रुपं न्यासेजुयेगु तकं वातावारण खनेमदूगु खँ वःगु दु । बुद्धपोखरी, लामाटार लगायतया थासय् साँस्कृतिक व प्राकृतिक पर्यटनया सम्भावना दयानं विकास जुइमफूगुपाखें जनता निराश खनेदु । थनया पर्यटन नापं टेक्सटाइल उद्योग लगायत आधुनिक कृषि विकास यायेत जनतां लँ पियाच्वंगु खनेदु ।    
 
थुगु निर्वाचनपाखें विजयी जुयादिल धाःसा छिगु प्रमुख प्राथमिकता छुकिइ जुइ?
 
प्रविन ः व्यवहारिक कथं छेँछेँ वनेगु जिमिगु अभियानपाखें अभिव्यक्त समस्यायात सम्वोधन यायेत न्हापां ला प्रचलनथे जुयावःगु सिद्धिपुरया युवात विदेशय् वनिगु अवस्थायात हिलेत स्थानीय लजगाया व्यवस्था नीतिगत रुपं गुकथं यायेफै धैगुपाखे पला न्ह्याकेगु जुइ । थुगु क्षेत्रयात लागूपदार्थ दूव्र्यसनमुक्त घोषणायाकेत माःगुकथं राष्ट्रिय व अन्तर्राष्ट्रिय परियोजना केन्द्रित याकेगु नापं दीगो विकास अवधारणासहित शिक्षित सुरक्षित बाल्यकाल स्थापनायानितिं युवापिन्त लजगाः व्यवस्थासहित परिचालनपाखें ध्यान तयेगु जुइ । थुगु क्षेत्रया उद्योग, पर्यटन व भौतिक पूर्वाधारया विकासयानितिं युवापुस्ताया राजनीतिइ प्रत्यक्ष योगदानया आवश्यकता दु धैगु ध्वाःथुइकेगु कुतः जुइ ।