यु २३ फुटबलय् नेपाःया लगातार हार
कौलागा अष्टमी ११४१, कात्तिक १२ शुक्रबाः
एएफसी युथ २३ एसियन कप फुटबल ल्यज्या धेंधें बल्लाखय् नेपालया यात्रा पुचः झ्वलय् हे लिकुंगु दु ।
पुचःया निगूगु कासाय् म्हिगः ताजकिस्तानलिसे ६–० गोलं बुइधुंकाः नेपालया संभावना फूगु खः । न्हापांगु कासाय् नेपालयात इरानं ४–० गोलं बुकूगु खः । आः पुचःया लिपांगु कासाय् नेपालं आइतबाः लेबनानलिसे म्हिती ।
पुचः ‘बी’ इ मदिक्क निगूगु कासा त्याकेधुंकाः ताजकिस्तान ६ ल्याःलिसें शीर्ष थासय् दुसा ज्वलिंज्वः ६ ल्याः मुंकूगु इरान गोलअन्तरया लिधंसाय् निगूगु थासय् दु । लगातार निगू कासा बूगु नेपाल व लेबनानं ल्याः मुंकेमफुनि ।
म्हिगः जूगु न्हापांगु कासाय् इरानं लेबनानयात २–० गोलं बुकूगु खः । ११ पुचःया ब्वति दुगु ल्यज्या चरणं प्रत्येक पुचःया त्याकामि व व प्यंगू उत्कृष्ट उपविजेता सन् २०२२य् उज्वेकिस्तानय् जुइगु एएफसी यु–२३ एसिया कपया लागिं ल्यइ ।
Categorized in कासा