येँँ महानगरं १० हजार ५सःम्हेसित राहत इन
नृपेन्द्रलाल श्रेष्ठ | चौलाथ्व त्रयोदशी ११४०
येँ महानगरपालिकां येँ महानगर दुने च्वनावःपिं असहाय, अतिविपन्न व न्हिं ज्यालदारी यानाः नयेमाःपिं मनूतय् पहिचान यानाः उमित राहत उपलब्ध इनेगु ज्या तच्वयेकूगु दु । छुं दिं न्ह्यः जक हे कोरोना भाइरस (कोभिड–१९) सम्वन्धि राहतवितरण मापदण्ड–२०७६ पारित याःगु येँ महानगरपालिकां राहत वितरणव र लगत मुनेज्यायात तच्वयेकूगु खः ।
शनिबाःतक्क यैँ महानगरपालिकां ३२गुलिं हे वडापाखें १०द्वः ५सः व २३म्हेसित राहत वितरण याःगु खः ।
‘शनिबाःतक्कय् ३२गुलिं वडापाखें २२द्वः ६सः व ४२म्हेसिया विवरण मुनेज्या क्वचाःगु दु’ प्रशासन विभाग प्रमुख नमराज ढकालं धयादिल, ‘हामा मदुपिं, आयश्रोत मदुपिं, मेपिनिगु ग्वाहालिइ च्वनेमाःपिं, आम्दानीया छुं स्थायी स्रोत मदुपिं, न्हि ल्हाःम्हुतु चूलाकेत थाकुपिं अले सम्वन्धित वडां अतिविपन्न धकाः प्रमाणित याःपिं व्यक्ति वा परिवारयात राहत बीगु मापदण्ड जिमिसं दयेकागु दु ।’
संगठित संस्थाय् ज्या याइपिं बाहेक येँ महानगरय् दैनिक ज्याला मजदुरी यानावःपिं श्रमिक लगायत नं मापदण्ड दुने दुगु वयकलं जानकारी बियादिल ।
अथे हे, महानगरपालिकां थौंकन्हय् हे जक विदेश लिहांवयाः महानगरपालिका दुने च्वनाच्वंपिं मनूतयगु नां मुंकेज्यायात नं तिव्र रुपं न्ह्यःने यंकागु ढकालं जानकारी बियादिल ।
येँ महानगरपालिकाया प्रमुख बिद्यासुन्दर शाक्यया अध्यक्षताय् च्वंगु ४३क्वःगु नगर कार्यपालिका बैठकं विवरण मुंकेत छगू हे कथंया फारम ३२गुलिं वडायात वितरण याःगु खः । व हे लिधंसाय् विवरण मुनेज्यायात तच्वयेकागु वयकलं धयादिल ।
थ्व हे दथुइ, वडातयसं क्वारेन्टाइन दयेकेज्यायात नं तच्वयेकूगु दु । वडा नम्बर–४ या नायः मोहन विष्टं बागमती कलेज सुकेधारायात २७ शैयाया क्वारेन्टाइन दयेकागु जानकारी बियादिल ।
उगु वडां करीब २द्वःम्हेसित राहत वितरण यायेगु योजना दयेकूगु दु । नायः विष्टया कथं आइतबाः जक हे ५३७म्हेसिनं राहत काःगु दु ।
१० वडां नं द्वःछिम्हेसित राहत वितरण यानागु धाःगु दु । १८ वडां १२सः स्वयां आपाःसित राहत इनागु जानकारी बिल । २७ वडां नं समस्याय् लाःपिं करीब ७सःम्हेसित जा नकूगु दु ।
अथे हे, ५ वडां ९सः स्वयां आपाः व ११ वडां ६सः स्वयां आपाःसित राहत वितरण यात । १४ वडां नं ७सः स्वयां आपाःसित राहत वितरण याःगु दु । थुखे ३१ वडां थीथी न्याथासं ३२४ परिवारयात राहत इनागु वडा सचिव सुरेश साहुं जानकारी बियादिल ।
वडा १३ या राहत वितरणया अनुगमनया नितिं येँ महानगर प्रमुख बिद्यासुन्दर शाक्य थः हे थ्यंकादीगु खः । संघीय सांसद, जीवनराम श्रेष्ठ, प्रदेश सभा सदस्य राजेश शाक्य, जिल्ला समन्वय समितिया प्रमुख शिवसुन्दर राजवैद्य व वडाध्यक्ष ध्रुवनारायण मानन्धर नं राहत वितरण ज्याझ्वलय् थ्यंगु खः ।
थुगु वडा कालीमाटी तरकारी बजार दुगु क्षेत्र खः । उगु वडाय् छन्हुं हे २५० स्वयां आपाःसित राहत ब्यूगु खः ।
येँ महानगरपालिकाया प्रवक्ता इश्वरमान डंगोलया १५ वडां नं आइतबाःतक्कय् ६सःम्हेसित राहत वितरण याःगु दु । प्रवक्ता डंगोलं करीब १३सःया बिवरण मुनेधुनागु जानकारी बियादिल ।
मेयर शाक्य मतदाता जुयाच्वंगु २१ वडां नं राहत वितरणया न्हापांगु दिं आइतबाः ११०म्हेसित वडा ज्याकुथिं हे राहत इनागु वडाध्यक्ष उदयचुडामणि बज्राजार्यं जानकारी बियादिल । थनया राहत इनेज्या मेयर शाक्यं हे यानादीगु खः ।
थुगु वडां शनिबाःतक्कय् २१०म्हेसिया विवरण मुंकूगु दु ।
अथे हे, १६ वडां नं शनिबाःतक्कय् ३२सःम्हेसिया विवरण मुंकूगु दुसा ४८६म्हेसित राहत वितरण याःगु दु ।
वडा २६य् नं राहतया माग यासें १५२०म्हेसिनं थःगु नां दुथ्याकूगु वडाध्यक्ष ख्याम तिवारीं जानकारी बियादीगु दु ।
येँय् नं पिहांवनीगु गाडीया बसपार्क थ्व हे वडाय् दुगु जूगुलिं महानगरया दक्कले वयेवने जुइगु थुगु वडाय् असंगठित क्षेत्रया श्रमिकया ल्याः नं उतिकं हे दुगु वयकःया धापू दु ।
राहत वितरणया न्हापांगु दिनय् हे २९७म्हेसित राहत इनागु जानकारी वयकलं जानकारी बियादिल । वयकलं आइतबाःतक्कय् ५६०म्हेसिनं राहत काःगु जानकारी बियादिल ।
सामाजिक दुरी कायम तसें वडापाखें हे राहत इनागु वयकलं जानकारी बियादिल ।
Categorized in राष्ट्रिय
