येँँ महानरं बरिष्ठ ज्येष्ठ नागरिक भत्ता छेँय् वना बिइगु सुरु
सुरेन्द्रभक्त श्रेष्ठ | तछलाथ्व दशमी ११४०,जेठ १९ सोमवाः
लकडाउनया इलय् येँ महानगरपालिका वडा–१८ या अध्यक्ष न्हुच्छेकाजी महर्जन इखापोखरीया ८९ दँया विष्णुप्रिया मालीया छेँय् वना बरिष्ठ ज्येष्ठ नागरिक भत्ता वःगु इलय् तसक लय्ताःगु दु । वडाध्यक्ष महर्जनं मालीया ल्हातय् बरिष्ठ ज्येष्ठ नागरिक भत्ताया रुपय् १२ द्धः बियागु इलय् तसक लय्तागु धका धयादिगु दु ।
येँ महानगरपालिकाय् पूर्ण अपाङ्गता जुपि ४४५ म्हेसित लकडाउनया इलय् बिशेष भत्ता छेँय् छेँ वना बिइगु याःगु दु । थुकिया लागि महानगरं ३२ गु हे वडाय् ध्यवा निकासा याये धुकुगु दु । गन बिइ धुकुगु दु गन बिइगस सुरु याये त्यःगु दु ।
‘येँ महानगरपालिकां जेष्ठ नागरिकयात समाजं बियाच्वंगु योगदानया सम्मान स्वरुप दँय् दँसं वरिष्ठ जेष्ठ नागरिकपिन्त बिशेष भत्ता बिया वय च्वंनागु खः धका,’ येँ महानगरपालिकाया मेयर बिद्यासुन्दर शाक्यं धयादिसे, ‘आः देय् हे बन्दाबन्दीया अवस्थाय् दु । थज्यागु इलय् बरिष्ठ ज्येष्ठ नागरिकपिन्त महानगरपालिकां बिया वयाच्वनागु बिशेष भत्तां छु भचा सा राहत महशुस जुइमाः धका छेँय् छेँय् वना बिइगु व्यवस्था यानागु खँ धका धयादिगु खः ।’
मेयर शाक्य दुःखया इलय् न महानगरपालिका जिमिगु साथय् दु धका महशुस बिइगु कथं थुगु इलय् भत्ता उपलब्ध यानागु दु धका धयादिगु खः । ‘३२ गु वडाय् ९ द्ध व ११७म्ह बरिष्ठ ज्येष्ठ नागरिक दुगु तथ्याङ्क दु धयादिगु दु ।’ पूर्ण अपाङ्गता जुपि नागरिकपिन्त महानगरपालिकां दच्छिया स्वद्धः बिया वयाच्वनागु दु धका धयादिगु दु ।
येँ महानगरपालिकाया प्रशासन विभाग प्रमुख नमराज ढकालं ९११७ म्ह बरिष्ठ ज्येष्ठ नागरिक व पूर्ण अपाङ्गता जुपि ४४५ म्हेति महानगर बिशेष भत्ता उपलब्ध यायेत ३२ गु वडाय् ११ करोड ६ लाख व १७ द्धःःनिकासा बिइ धुुकुगु दु धका जानकारी बियादिगु दु ।
