येँयाःया झ्वलय् थौं थःनेयाः
लहनान्युज | ञंलाथ्व पुन्ही ११४१, असोज ४ सोमबाः
स्वनिगःया नेवाःतय् तःजिगु जात्रा येँयाःया झ्वलय् थौं थःनेयाः ।
थःनेयाःया झ्वलय् थौं रथयात येँया थःने लागाय् साली । बसन्तपुलिं रथ सालेगु न्ह्याकाः प्याफलं यतखा, न्यत, त्यंगः, न्ह्यःखा, थाय्मदु, न्हाय्कंत्वाः, असं, बालकुमारी, जनबहाः, वंगः, मखं जुयाः बसन्तपुलिइ हे थ्यंकाः याः न्याइ ।
थौंया दिनय् सकल नेवाःतय् छेँय् छेँय् समयबजि जोरय् यानाः नयेगुलिसें इनाबीगु चलन नं दु । थौं ल्याय्म्हत पुचः पुचः मुनाः ला छकू वय्कः समयबजि धकाः हाहां त्वाःत्वालय् समयबजि फ्वंवनेगु याइ । येँयाःया पुन्हिया दिं जूगुलिं येँयाः पुन्हि नं धाइगु थौंया दिनय् समयबजिया विशेष महत्व दइगु जूगुलिं समयबजि पुन्हि नं धाय्गु याः ।
स्वनिगःलिसें धौख्यः, दोलखा आदि थासय् नं न्यायेकीगु येँयाः लिच्छवीकालय् न्ह्यायेधुंकूगु धयातःगु दु । तर कुमारीया रथ जात्रा धाःसा येँया लिपांम्ह मल्ल जुजु जय प्रकाश मल्लं न्ह्याकेब्यूगु खः ।
व्रत च्वनाच्वंम्ह थः मांया पूजाया नितिं पालिजाः स्वां काःवःम्ह ईन्द्रयात स्वांखुँ धकाः ज्वनाः जात्रा याःगु किम्वदन्ति येँयाःलिसे स्वानाच्वंगु दु ।
Categorized in राष्ट्रिय
