येँयाःया द्यःप्याखं खलःयात हन
जात्रापर्व ब्यवस्थापन समिति नयाँबजाःया ग्वसालय् येँयाःया इलय् पिहांवःगु श्री हल्चोक आकाश भैरव, लाखय्, पुलुकिसि व महाकालियात हनेज्या थौं येँय् क्वचाल ।
 
ज्याझ्वलय् डा.सत्यमोहन जोशीं सम्मानितपिन्त सम्मान लःल्हानादिल । लिसें ज्याझ्वलय् ज्याझ्वःयात ग्वाहालि याःपिं ग्वाहालिमिपिन्त नं हंगु खः ।
 
नुगः खँ तयेगु झ्वलय् शताब्दि पुरुष डा. सत्यमोहन जोशीं हिन्दु अले बौद्ध धर्मावलम्वि सकसिनं हनीम्ह जीवित देवी कुमारी नेपालय् हे जक दुगु खँ तयादिल । येँ महानगरपालिकाया कार्यकारि अधिकृत रुद्रसिं तामाङं नेवाःतयगु तजिलजि हे हलिमय् नेपाःया म्हसिका जुयाच्वंगु धयादिल ।
 
सांसद रामवीर मानन्धरं सास्कृति ख्यलय नं थुकथं सम्मान याःगु बालागु परम्पराया शुरुवात कथं कायेमाःगु खँय् बः बियादिल ।
 
ज्याझ्वलय् हनुमानध्वाखा दरबार क्षेत्र संरक्षण ज्याझ्वःया प्रमुख उदय पसखलः श्रेष्ठ, राजा शाक्य, अमृतचन्द श्रेष्ठ, अष्टनारायण महर्जनलिसें नं थःथःगु नुगःखँ तयादीगु खः ।