येँया तीनकुनेय् अत्याधुनिक बुद्धपार्क दयेकीगु, योजना थज्याःगु दु
नृपेन्द्रलाल श्रेष्ठ | दिल्लाथ्व दशमी ११४०
येँ महानगरपालिकां वडा ३२ स्थित तीनकुनेय् अत्याधुनिक बुद्धपार्क दयेकीगु जूगु दु । आर्थिक दँ २०७७/०७८ या नीति तथा कार्यक्रमय् ह बुद्धपार्क दयेकेगु योजना दुथ्याकूगु येँ महानगरपालिकां पार्क दयेकेज्यायात तच्वःगु गतिइ न्ह्यःने यंकेगु जानकारी ब्यूगु दु ।
येँ महानगरपालिकाया मेयर विद्यासुन्दर शाक्यं नेपाल सरकारं २०३२ साल जेठ १४ य् जग्गाप्राप्ति ऐन कथं तीनकुनेया बुँ जग्गा अधिग्रहण यासांनिसें हे तीनकुनेये पार्क बनाउने योजना दयेकूगु धासें जग्गाया मुआब्जा विवाद ज्यंके मफुबलय् योजना अलपत्र लाःगु धयादिल ।
थुगुसी दक्वं विवाद ज्यंकाः योजना न्ह्यःने यंकेगु तयारीइ थःपिं जानागु प्रमुख शाक्यया धापू खः ।
प्रमुख शाक्यं तीनकुनेया मुआब्जा विवाद ज्यंकेत येँ महानगरपपालिकां प्रारम्भिक अधिकारी हे क्वःछ्यूगु व प्रतिवेदन तकं सम्वन्धित निकायस छ्वयेधुंकूगु जानकारी बियादिल ।
पार्कया डिजाइन तयारी अवस्थाय् दुगु व समस्या ज्यनाकथं ज्या तच्वःगु गति लिसें न्ह्याःवनीगु शाक्यया धापू खः ।
जग्गा अधिग्रहण यायेमाःगु व मुआब्जा इने ल्यं दनिगु क्षेत्रफलया लागिं माःगु धेबा व्यवस्थापन यायेत संघीय सरकार नं सकारात्मक दुगुलिं थुगुसी मुआब्जा विवाद ज्यनाः पार्क दयेकेज्या न्ह्याःवनीगुलिइ महानगरपालिका विश्वस्त खनेदु ।
छुं जग्गाधनीं चलनचल्तीया भावय् मुआब्जा माग यायेधुंकाः विवाद आःतक्क ज्यनेमफूगु खः । यक्व हे जग्गाधनीं न्हापा हे मुआब्जा कायेधुंकूगु दु ।
येँमपा सम्पदा तथा पर्यटन विभाग प्रमुख अर्चना शाक्यं करीब ५० रोपनी स्वयां आपाः क्षेत्रफलया तीनकुनेय् बुद्धपार्क दयेकेत डिजाइन तयार जुइधुंकूगु जानकारी बियादिल ।
‘हिन्दु व बौद्ध धर्मया फ्युजन यानाः दयेकीगु पार्कया स्वकू कुनय् ब्रह्मा, विष्णु व महेश्वरया प्रतीक लिसें ‘बुद्ध’, ‘धर्म’ व ‘संघ’यात लिधंसा नालाः डिजाइन दयेकागु दु,’ विभाग प्रमुख शाक्यं जानकारी बियादिल ।
शाक्यया कथं अण्डरग्राउन्ड पार्किङ, न्हापांगु तलाय् क्युरिओया पसः, सार्वजनिक चःबि, प्रदर्शनी कक्षत दइ । पार्कय् अपाङ्गमैत्री, मस्त म्हितेगु लिसें ज्याथःपिं नागरिकया आराम यायेगु थाय्, साइकल ट्याक लिसें च्वनीगु कथं डिजाइन तयार जूगु दु ।
डिजाइन कथं च्वयया तलाय् २सः क्षमताया ध्यानकेन्द्र दइ ।
पार्कया डिजाइन कथं तीनकुनेया दथुइ १३ मिटर जाः व ९६ मिटर व्यासया गुम्बज आकारया संरचना दइसा उगु गुम्बजय् करीब १६ मिटर तःधिकःगु बुद्धया मुर्ति नं च्वनी ।
मुर्तिबाहेक करीब छगू अर्बत्याया लगानीइ दयेकीगु बुद्धपार्कय् बुद्धमुर्ति दइगु थासय् तक्क थ्यंकेत १२ प्रवेशद्वार दइ ।
Categorized in राष्ट्रिय
