येँया सौन्दर्यताया नितिं न्ह्यज्यानाच्वंगु पलाः
जुजुमान महर्जन
 
 
साँस्कृतिक शहरकथं म्हसीका वयाच्वंगु येँ महानगरय् अव्यवस्थितकथं विकसित जुया वनाच्वंगु शहरीकरणया नापनापं शहरय् विज्ञापनया होडबाजीं यानाः शहरयात कुरुप दय्काच्वंगु खँय् ताःई न्ह्यःनिसें सम्बन्धित ख्यलं च्यूताः प्वंका वयाच्वंगु खः । शहरया मू मू चोकय् तयातःगु थीथी विज्ञापनया होर्डिङ बोर्डं महानगरया छगू मू आयश्रोत जुयाच्वंगु खःसा मेखे थ्व हे होर्डिङ बोर्डं शहरया सौन्दर्ययात हिस्यानाच्वंगु दु ।
 
थ्यंमथ्यं प्यदँ न्ह्यः वि.सं. २०७२ साल भाद्र १६ गते सर्बोच्च अदालतया तत्कालीन प्रधानन्यायाधीश कल्याण श्रेष्ठ व न्यायाधीस ओमप्रकाश मिश्रया मंकाः इजलाशपाखें शहरया सौन्दर्यताय् लिच्वः लाकाच्वंगु थजाःगु होर्डिङ बोर्डयात चीकेगु नितिं उजं ब्यूगु खः । उगु इलय् ब्यूगु आदेशय् महानगर क्षेत्रय् दुगु होर्डिङ बोर्ड, अंगलय् च्वयातःगु थीथी विषयवस्तु, पोष्टर, पम्प्लेटलिसेंया हलंज्वलं चीकेमाःगु खँ न्ह्यथनातःगु खः ।
 
तर थुगु खँयात कयाः सम्बन्धित पक्षं अवहेलना याना वयाच्वंगु खः । आः वयाः थुगु खँयात कयाः अवहेलना मुद्दा दायर जुइवं हाकनं महानगरं होर्डिङ बोर्ड चीकेगु ज्याय् तदारुकता क्यंगु दु । 
 
होर्डिङ बोर्ड चीकेगु ज्या थौंकन्हय् मदिक्क न्ह्यानाच्वंगु दु । विशेष यानाः येँया सोह्रखुट्टे, त्रिपुरेश्वर, पुतली सतक, माइतीघर, विजुलीबजाः, न्हू बानेश्वर, तीनकुने आदि थासय् तयातःगु होर्डिङ बोर्ड चीकेगु ज्या यानाच्वंगु दु ।
 
खय्त ला थुकथं होर्डिङ बोर्ड चीकेगु नितिं वंगु विहिवाः गृहमन्त्री रामबहादुर थापाया संयोजकत्वय् च्वंगु मुँज्या कार्यदल दय्काः क्वःछ्यूगु खः । थुकिया नितिं महानगरपालिकां प्यंगू कार्यदल दय्काः अभियान न्ह्याकूगु खःसा थुगु अभियानय् जिल्ला प्रशासन कार्यालय, नेपाल विद्युत प्राधिकरण, टेलिकम, नेपाल प्रहरीलिसें सतक विभागया प्रतिनिधित दइकथंया कार्यदल दय्काः न्ह्यज्याःगु खः ।
 
थ्व हे झ्वलय् येँ महानगरपालिकां थुगु अभियानयात येँया थीथी चोकपाखें न्ह्याकूगु खःसा येँया सौन्दर्यता थकाय्गु धकाः थुगु ज्यायात निरन्तरता बिया वयाच्वंगु दु, गुगु च्वछाय्बहःगु ज्या नं खः ।
 
होर्डिङ बोर्ड जक मखु, थीथी थासय् पोष्टर, पाम्प्लेट तिकेगु ज्यायात निषेध याःगु दु । थजाःगु ज्याय् दुथ्याःपिन्त ज्वनाः कारवाही याय्गु ज्या नं न्ह्याकूगु दु । कारवाहीकथं न्यय्च्याद्वःनिसें ७०द्वःतका जरिवाना काय्गु ज्या जूगु नं सीदुगु दु ।
 
येँया सौन्दर्यताय् लानाच्वंगु लिच्वःयात कयाः इलय्ब्यलय् चर्चा जुयाच्वंसां नं थुकियात कयाः खास हे ध्यान मब्यूगु अवस्थाय् आः वयाः नेपाल भ्रमण वर्ष २०२० हनेत्यंगुलिं थुगु ज्याझ्वः न्ह्याकेमाःगु ताय्कूगु खः धाःसा पाइमखु । मखुसा गृहमन्त्रीं हे थुकथं कार्यदल दय्काः ज्या न्ह्याकेमाःगु स्थिति ब्वलनेम्वाःगु खः । मेखे येँया सौन्दर्यतायात कयाः स्वयम् नगरवासी व थनया जनप्रतिनिधिपिन्सं च्यूताः काय्माःगु खः ।
 
न कि प्यदँ न्ह्यः यानातःगु फैसलायात कार्यान्वयन मयाः धकाः हाकनं अवहेलना मुद्दा दायर याय्धुंकाः जक सौन्दर्यतायात ल्यंकेगु अभियान धकाः ज्या न्ह्याकेगु नं उलि पाय्छि मखुथें च्वं । थजाःगु ज्याय् स्वयम् महानगरया प्रतिनिधिपिन्सं न्हापा हे बिचाः याय्माःगु खनेदु । महानगरया थ्व बांलाःगु अभियान खःसां नं सर्बोच्चय् अवहेलना मुद्दा लाय्धुंकाः जक न्ह्यागुलिं थुकियात बेक्वःगु मिखां स्वइगु स्वभाविक हे खः । 
 
न्ह्याग्गु हे थजु, येँया सौन्दर्यताय् लिच्वः लाकाच्वंगुयात लिकाय्गु ज्या न्ह्याकूगुलिं थुकियात कयाः च्वछाय् हे माः । तर थ्व ज्यायात गबलय् तक निरन्तरता बीगु खः, उकियात धाःसा स्वय् हे ल्यं दनि ।