येँय् प्यम्ह व ख्वपय् छम्ह नाप ३२३म्हेसित कोरोना
लहनान्युज | तछलागा पारु ११४०,जेठ २४ शनिवाः
नेपालय् कोरोना संक्रमितपि स्वद्धः स्वया अप्वःगु दु ।
थौं नीप्यघौया दुने थप ३२३म्हेसित कोरोनाया संक्रमण खने दुगु दु । थुकथं संक्रमित पिनिगु ल्याः ३२३५म्ह थ्यंगु दु ।
थौं कोरोना संक्रमण खने दुपि २८६म्ह मिजंपि व ३७म्ह मिसात खः ।
स्वास्थ्य तथा जनसंख्या मन्त्रालयया प्रवक्ता डा. विकास देवकोटां बिगु जानकारी कथं येँया राष्ट्रिय जनस्वास्थ्य प्रयोगशालाय् याःगु परीक्षणय् येँय् ४म्ह व ख्वपय् १म्ह नाप १२० म्हेसित
कोरोनाया संक्रमण खनेदुगु दु ।
येँय् खनेदुपि ३१ व ३५दँया मिसा व ३६ व ४६दँया मिजंपिन्त संक्रमण जूगु खः । अथेहे ख्वपया कमलविनायकय् च्वम्ह ३१दँया मिसायात कोरोनाया संक्रमण जूगु खः ।
येँया प्रयोगशाला बाहेक देय्या थीथी थासय् याःगु परीक्षणय् थप २ सय ३म्हेसित कोरोनाया संक्रमण जूगु दु ।
