येँ कोरोना संक्रमित मिसा मच्छेगायाम्ह
लहनान्युज | बछलागा षष्ठी ११४०, बैसाख ३१ बुधवाः
येँ ३३ दँयाम्ह कोरोना संक्रमित मिसा चन्द्रागिरि नगरपालिकाया मच्छेगामय् च्वम्ह धका सिइदुगु दु । उम्ह मिसा कन्चनपुरया महेन्द्रनगरं २९ गतेय् येँ लिहा वम्ह खः ।
येँ थ्यःगु इलय् वयाःगु स्वाब परीक्षणया लागि नमूना संकलन यासे जनस्वास्थ्य प्रयोगशाला टेकुइ छ्वःगु इलय् वयात कोरोना पोजेटिभ खनेदुगु खः ।
येँे ३३ दँया म्ह मिसा नाप येँ खनेदुगु थ्व नाप न्याम्ह खः । येँय् संक्रमित खनेदुपि प्यम्ह हे वास याका छेँय् लिहा वने धुकुगु खः ।
म्हिगः मंगलवाः चान्ह्य येँय् छम्ह व ख्वपय् निम्ह नाप मेपि २६म्हसिके कोरोना संक्रमण पुष्टि जुगु धका स्वास्थ्य मन्त्रालयं जानकारी बिःगु खः ।
ख्वपय् संक्रमित २७ दँयाम्ह मिजं सशस्त्र प्रहरीयाम्ह खः । उम्ह मनू रामेछाप स्थायी ठेगाना जुया ख्वपया चाँगुनारायण नगरपालिका १ दुवाकोटय् च्वना च्वम्ह खः ।
उम्ह मनू नेकपा नेता नाप पूर्वगृहमन्त्री भीम रावलया सुरक्षाकःमि खः ।
मेम्ह छम्ह मिसा सुनसरीपाखे ख्वपया न्हुगुठिमीइ पासाया थाय् वम्ह खः ।
