येँ मनपां निःशुल्क एम्बुलेन्स सेवा सुरू यात
नृपेन्द्रलाल श्रेष्ठ | चौलागा षष्ठी ११४०, बैसाख १ सोमवाः
हलियकं महामारीं रूपं फैले जुयाच्वंगु कोरोना भाइरस (कोभिड–१९) रोकथामया लागि सरकारं देय् यक लकडाउन याःगु कारण विशेष परिस्थितियात ध्यान तया नगरवासीया सुविधाया लागि येँ महानगरपालिकां थौं निसे निःशुल्क एम्बुलेन्स सेवा सञ्चालन याःगु दु ।
कोरोना भाइरस संक्रमित बाहेक मेगु स्वास्थ्य समस्या जुपि नगरवासीयात छेँय् न अस्पतालय्, अस्पतालं छेँय् व छगु अस्पताल मेगु अस्पतालय् यक्केत लागि थुगु सेवा संचालन यायेगु निर्णय
महानगर याःगु दु । थुकिया लागी येँ महानगरपालिका व संयुक्त एम्बुलेन्स चालक संघ, नेपाल काठमाडौं जिल्ला कार्यसमितिया सहकार्य यायेगु लागि थौं छगु सम्झौता याःगु दु ।
थुगु सेवां महानगरवासीं आः निशुल्क सेवा काये फइगु जुगु दु । थ्व निःशुल्क सेवा महानगरया को भौगौलिक सीमा स्वया २ कि.मि. तापाक्क तक काये फइ । येँ महानगर स्वया निगु किमि तापाक्क च्वपिन्स धाःसा आवश्यक शुल्क बिइ माःगु प्रावधान तया तःगु दु ।
थुगु सेवाया लागि न्यागः एम्बुलेन्स २४ सै घन्टा उपलब्ध जुइगु व सेवा बिउगु बापत एम्बुलेन्स सेवां सेवाग्राही नाप छु न मेगु शुल्क कायेगु व नाइँनास्ती, भाः याये मदइगु थुगु सम्झौताय् उल्लेख दु । थुगु सेवाया लागि कामपाया टोल फ्रि नं. ११८० य् स्वापु तया थुगु सेवा काये फइ ।
कोरोना भाइरसपाखे संक्रमित ल्वगियात महानगरपालिकाया सहकार्यय्् सञ्चालित नेपाल एम्बुलेन्स सेवा–१०२ न्हापानिसे दु । १०२ या एम्बुलेन्स थौंकन्ह्य कोरोना भाइरस ल्वगियात छुटे याना मेपि ल्वगियात येँ महानगरपालिकां मेगु थप सुविधा व्यवस्था याःगु खः । कामपां थुगु सेवा नुगः ल्वय् न्हिन्हि डायलसिस याये माःपि चिनि ल्वय्या ल्वगि तयेत फाइदा जुइगु बिस्वास महानगरपालिका याःगु दु ।
येँ महानगरपालिकाया मेयर विद्यासुन्दर शाक्यं थौंकन्ह्य लकडाउनया कारण येँं महानगरपालिका दुने न्हापागु प्राथमिकताय् तया ज्या न्ह्याकेगु जुइ धका धयादिगु दु ।