येँ मनपाया तरकारी बजाः झिं छथाय् तइगु
नृपेन्द्रलाल श्रेष्ठ | चौलाथ्व चतुर्दशशी ११४०, २५

येँ महानगरपालिका तरकारी न्याये थाय् हूल जुगुलिं झिंछगू थासय् तरकारी बजाः तयेगु क्वःछिउगु दु । बल्खु व कालिमातिया तरकारी बजारय् हुलमुल जुगुलि नगरपालिकां तरकारी मीगु थाय् लागि मेथाय् ल्यःगु दु ।
येँ महानगरपालिकां कलंकी चोक, बाफल चोक, स्वयम्भू चोक, बनस्थली चोक, गोंगःबुँ चोक, बसुन्धरा चोक, गोपीकृष्ण हल चोक, तीनकुने चोक, लैनचौर चोक, रत्नपार्क चोक व कोटेश्वर चोकय् लकडाउन ई तकया निंतिं तरकारी बजाः तयेगु क्वःछिउगु खः ।
थुपिं थासय् सुथय् ८ बजे तक तरकारी बजाः तयेकेगु खँ धाःगु दु । वय्कलं थुपिं बजारय् नं फुक्क कथंया तरकारी व फलफूल दइगु खँ धाःगु दु ।
अथेहे येँ जिल्लाया सिडिओ जनकराज दाहालया अध्यक्षताय् च्वंगु छगू बैठकं भारतं नेपालय् तरकारी हइबलय् तरकारी व फलफूल लिसें भारतीय नागरिक नं नेपाः दुहां वइगु जूगुलिं उमिगुपाखें कोरोना संक्रमण जुइफुगु खतरा दुगुलिं भन्सार विन्दुइ हे भारतं नेपाः दुहां वइगु तरकारी व सिसाबुसा आयात पनेत च्वय्या निकायय् इनाप यायेगु व नेपाःया व्यवसायीतय्त नं तरकारी व फलफूल कायेत भारत मछ्वयेगु निर्णय याःगु दु ।