येँ मनपाया मेयर बिद्यासुन्दर शाक्यपाखे न्हूदँ २०७७ या भिंतुना
शोभा श्रेष्ठ | चौलागा पंचमी ११४०, चैत्र ३० आईतवाः
विक्रम संवत् २०७७ न्हूदँया लसताय् सकल महानगरवासीपिन्त भिंउसाँय्, ताःआयु व उत्तरोत्तर प्रगतिया लागि दुनुगलंनिसें भिंतुना देछानाच्वना । विश्वन्यंकं हे महामारीया रूपय् न्यना वनाच्वंगु कोरोना भाइरस
(कोभिड–१९) पाखें झी सकलें याकनं हे मुक्त जुइ फयेमा धकाः भिंतुना देछासें थुकिया विरुद्ध ल्वायेत साहस व हःपाः चूलायेमा धकाः नं कामना यानाच्वना ।
कोरोना भाइरसया संक्रमण विरुद्ध ल्वायेया निंतिं झी सकलें थःथःगु हे छेँय् लकडाउनया अवस्थाय् च्वंच्वनागु दु । थज्याःगु स्थितिइ न्हूदँ मेमेगु सामान्य अवस्थाय् थें तःजिक न्यायेकेगु मयासे सरकारं लागू यानातःगु लकडाउनया पालना यासें छेँजःपिं जक च्वनाः न्यायेकादीत सकल महानगरवासीयात दुनुगलंनिसें इनाप यानाच्वना । थुगु विषम परिस्थितिइ महानगरवासीपिंत जूवंगु असुविधाया निंतिं दुःख नं प्वंकाच्वना ।
कोरोना भाइरसया संक्रमण विरुद्ध ल्वायेगु झ्वलय् येँ महानगरपालिकां न्हियान्हिथं थीथी वडाय् किटनाशक वासः छ्वाकेगु, ब्रुमरं सतक यचुपिचु यायेगु, छेँय् छेँय् मदिक्क फोहोर काः वनेगु ज्यायात तीव्र गतिं न्ह्याका वयाच्वंगु दु । लकडाउनया कारणं ल्हाःम्हुतु चूलाकेत समस्याय् लाःपिंत वडा कार्यालयपाखें राहत सामग्री इनेगु ज्या यानाच्वंगु दु ।
थ्वहे झ्वलय् छुं छुं मनूत लकडाउनया इलय् नं येँदेय् त्वःताः थःथःगु गामय् लिहां वनाच्वंगु समाचारत वयाच्वंगु दु । थ्व संकटया इलय् सुं नं नगर त्वःताः पिहा मवनेत व बरु नये–त्वनेया समस्या दुसा थः च्वंच्वनागु वडा कार्यालय वा येँ महानगरपालिकाया टोलफ्रि फोन नं. ११८० स स्वापू तयादीत नं इनाप यानाच्वना । लिसें महानगरपालिकां महानगरवासीया लागिं छ्यलाबुलाय् हःगु कोभिड–१९ संक्रमणया स्वमूल्यांकन याये फइगु Nepal COVID-19 Surveillance डाउनलोड यानाः छ्यलादीत व विरामी अस्पताल यंकेत समस्या जूसा महानगरपालिकाया सहकार्यय् सञ्चालित नेपाल एम्बुलेन्स सेवाया १०२ नम्बरय् स्वापू तयादीत नं दुनुगलंनिसें इनाप यानाच्वना ।
अन्त्यय्, वि.सं. २०७७ न्हूदँया लसताय् हानं छक्वः दुनुगलंनिसें भिंतुना देछानाच्वना । सुभाय् !
‘छेँय् हे च्वनाः सुरक्षित जुइ । Stay Home, Stay Safe.'
