येँ मनपाया मेयर व जापानिज मेयर दथुइ भेटघाट
नृपेन्द्रलाल श्रेष्ठ | यंलागा पंचमी ११३९ (सेप्तेवर १९ २०१९)
नेपाःया लागि जापानया राजदूत मासामिचि साइगाें बुधवाः येँ महानगरका प्रमुख बिद्यासुन्दर शाक्यनाप लाप लानादिगु दु । राष्ट्रिय सभा गृहया बिशिष्ट कक्षय् करीब आधा घण्टा अथे लाप लानादिगु खः ।
नाप लायेगु झ्वलय् मेयर शाक्यं जापान व नेपाःया दथुइ निगु देय् जापान व नेपाःया नगर—नगर दथुइ सम्बन्धया असर जुइगु छु न ज्या सुइपाखे न मजुइमा धका धयादिगु खः ।
अथेहे, राजदूत साइगों जापान सरकारया ग्वाहालिं बसन्तपूरय् निर्माणाधीन अबस्थाय् दुगु आगमछेँ पुननिर्माणया बिषयय् फरक—फरक थासय् फरक—फरक खँ वगुलि थःपि अन्यौलय् लाःगु धका मेयर शाक्यं आपसी सम्बन्धया खँ ल्ह्वनादिगु खः ।
उगु लाप लायेगु झ्वलय् राजदूत साइगाें आगमछेँ नाप येँ दुने दुगु सांस्कृतिक मूर्त अमुर्त सम्पदापाखे थः प्रोत्साहित जुगु धका न धयादिगु खः। इन्द्रजात्राया प्रसङ्ग वयकलं कुमारी रथ सालिइ झ्वलय् रथं वाः छ्वया हःगु स्वां जि सुरक्षित याना तयागु दु धका धयादिसे येँया जात्रा स्वयेगु लागि जिमि थासं मात्सुमोतो नगरपाखे प्रतिनिधि मण्डल वःगु खः धयादिगु खः । वयकलं आ वइगु नेपाल पर्यटन बर्षय् जापानीजत नेपाः वयेगुलि सहजीकरण यायेगु जुइ धका न धयादिगु खः ।
नाप राजदूत साइगां जापानया वातावरण मन्त्रालयं ग्वसा ग्वये त्यःगु फोहोर व्यबस्थापन सम्बन्धि प्राबिधिक ज्याझ्वलय् न मेयर शाक्ययात ब्बनादिगु खः सा वयकलं येँ फोहोर व्यवस्थापनय् प्रबिधि छ्यलेत जिपि इच्छुक दु धका न जानकारी बियादिगु खः ।
