येँ मनपा वडा १८ या भवन पुननिर्माण क्वचाल
सुरेन्द्रभक्त श्रेष्ठ | सिल्लाथ्व सप्तमी ११४० (फ्रेअवरी १ २०२०)
येँ महानगरपालिका वडा नंं. १८ या वडा भवन पुननिर्माण क्वाचागु दु । वःगु दँया माघ ७ गते महानगरया प्रमुख बिद्यासुन्दर शाक्यं उगु भवनया शिलान्यास यानादिगु खःसा थौं वयकःयाहे ल्हातं उलेज्या यानादिगु खः ।
थौंया उलेज्या ज्याझ्वलय् सहरी विकास राज्यमन्त्री रामवीर मानन्धरया न ब्बति दुगु खः । ‘केन्द्रनिसे दक्को वडाया थः थःगु हे भवन निर्माण यायेगु नीति कथं या योजनाया लिच्वः हे थुगु वडा १८ या भवन जुगु खः ।’ धका मेयर शाक्यं उलेज्या ज्याझ्वलय थःगु नुगः खँ तयादिगु खः । ‘सांस्कृतिक ऐतिहासिक येँ सहरय् हनुमान ढोका बिश्व सम्पदा क्षेत्रया परम्परागत शैलीमा वडा भवन निर्माण क्वचायेके खःगुलि थःत तसक लयतागु दु धका धयादिगु खः ।’
मेयर शाक्यं थःगु हे कार्यकालय् ३२ गु वडाया सुविधा सम्पन्न भवन निर्माण यायेगु योजना दु धका धयादिसे आ थःगु हे वडाया अप्वो भवन दये धुकुगु दु धयादिगु खः ।
उगुु भवनया उलेज्या झ्वलय् सहरी विकास राज्यमन्त्री रामवीर मानन्धरं सांस्कृतिक सुहरया दथुइ वडा भवन परम्परागत शैलीइ हे पुननिर्माण जुगु महानगर सम्पदा व्यवस्थापनय् ध्यान बिउगु बालगुु सन्देश वनेगु बिचाः तयादिगु खः ।
१८ वडाया वडाध्यक्ष न्हुछेकाजी महर्जनं लक्षित इलय् भवन निर्माण ज्या क्वचाःगु दु धयादिसे, ‘न्हुगु भवन निर्माणया लागि ४० लख खर्च जुगु धका धयादिगु खः । पुलागु भवनया पिनेया ख्वाः व न्हुगु भवनया डिजाइन तयार यायेत २० लख तक खर्च जुगु दु धका धयादिगु खः । वडा भवन सम्पदा मार्गय लागुलि सम्पदामैत्री दु धका न धयादिगु खः ।’
