येँ महानगरं सुविधा सम्पन्न ५० सैयाया अस्पताल दयेकेइगु
लहनान्युज | तछलागा त्रयोदशी ११४०,असार ५ शुक्रवाः
येँ महानगरपालिकाया मेयर बिद्यासुन्दर शाक्यं आर्थिक वर्ष ७७÷०७८ या नीति तथा कार्यक्रम सार्वजनिक यानादिसे २५९ बुँदा दुगु नीति तथा कार्यक्रमय् जनस्वास्थ्य सेवायात प्राथमिकताय् बिःगु दु ।
महानगरया मेयर शाक्यं येँ महानगरपालिकां थःगु नीति तथा कार्यक्रमय् थःगु हे सुविधा सम्पन्न म्हति ५० सैयाया अस्पताल स्थापना यायेत आवश्यक पूर्वाधार व्यवस्था यायेगु, महानगरपालिका दुने सञ्चालन जुया वयाच्वंगु सामुदायिक अस्पतालयात हे महानगरपालिका अस्पतालया रुपय् सञ्चालन यायेगु योजना समावेश याःगु दु ।
वरिष्ठ ज्येष्ठ नागरिकपिन्त विशेषज्ञ चिकित्सकपाखे नियमित नाप निशुल्क स्वास्थ्य परीक्षण सेवायात निरन्तरता बिइगु, महानगरय् च्वपिन्त स्वस्थ जीवनया लागि स्वच्छ आहार विहारया नीति अवलम्बन यायेगु खँ प्राथमिकता बिःगु दु । ‘गुणस्तरीय एवं न्युनतम स्वास्थ्य सेवा यायेत दइगु हकयात सुनिश्चित यायेत येँं महानगरपालिका दुने सञ्चालित दक्को सरकारी, निजी व सामुदायिक अस्पतालपाखे बिया वयाच्वंगु स्वास्थ्य सेवाया गुणस्तर नियमन व अनुगमन यायेत संस्थागत व्यवस्था मिले याये त्यःगु दु,’ नीति तथा कार्यक्रमय् वडा वडाय् मृगौला जोगाउ अभियान सञ्चालन याये योजना न हःगु दु ।
अर्बुद रोग लगायत मेगु दीर्घ ल्वय् इलय् हे स्वास्थ्य परीक्षण याना दीर्घरोग स्वास्थ्य परीक्षण कार्यक्रम सञ्चालन यायेगु नीति हःगु दु । कोभिड १९ व मेमेगु सम्भावित महामारीपाखे बचे जुइत आवश्यक निरोधात्मक उपाय प्रभावकारी रुपं लागु यायेगु धका धाःगु दु ।
