येँ महानगरपाखें प्रसुति गृह व वीरयात मेसिन ग्वाहालि
नृपेन्द्रलाल श्रेष्ठ | दिल्लागा चतुर्दशी ११४० (श्रावण ४) आइतवाः
येँ महानगरपालिकां चिकित्सा विज्ञान राष्ट्रिय प्रतिष्ठान वीर अस्पताल व प्रसुति तथा स्त्री रोग अस्पताल थापाथलीयात स्वास्थ्य ज्वलंत ग्वाहालि याःगु दु ।
भगिनी स्वापू स्थापित जनवादी गणतन्त्र चीनया तिब्बत स्वशाशित क्षेत्रय् लाःगु ल्हासा नगरं महानगरपालिकायात अनुदान कथं ब्यूगु छुं स्वास्थ्य ज्वलं निगू अस्पतालयात थौं लःल्हाःगु खः ।
१४ लख ९९द्वः ३सः व ७५ चिनियाँ युआन अर्थात करीब २ करोड ५७ लख २९द्वः २सः व ७५ तका ज्वलिंज्वःया स्वास्थ्य ज्वलंमध्ये थौं वीर अस्पतालयात स्वचालित न्युक्लेइक एसिड एट्राक्सन मेसिन छगः, न्युक्लेइक एसिड एट्राक्सन रिएजेन्ट ३द्वः थान, भिटिएम १५ सः थान, आरडीटी १५ सः थान व पर्सनल प्रोटेक्टिभ इक्युप्मेन्ट (पीपीइ) ५सः थान लःल्हाःगु खः ।
अथे हे, प्रसुती गृहयात पीसीआर मेसिन छगः, भिटिएम १५सः थान, आरडीटी १५सः थान व पीपीइ ५सः थान लःल्हानागु येँ महानगरपालिका शहरी स्वास्थ्य महाशाखाया प्रमुख नरेन्द्र विलास बज्राचार्यं जानकारी बियादिल ।
प्रसुती गृहयात लःल्हाःगु पीसीआर मेसिनया भाः ४ लख ४०द्वः युआन व वीर अस्पतालयात लःल्हाःगु स्वचालित न्युक्लेइक एसिड एट्राक्सन मेसिनया भाः १ लख युआन तूगु महानगरपालिकां जानकारी ब्यूगु दु ।
उगु इलय् येँ महानगरपालिकाया प्रमुख विद्यासुन्दर शाक्यं अस्पतालयात ग्वाहालि यायेखनाः लयताःगु धयादिल ।
‘आःया अवस्थाय् थ्व ग्वाहालि मगाः । छिकपिन्सं फक्व आपाः सेवा बियादिसँ व थुकिया फक्व सदुपयोग यानादिसँ’ शाक्यं धयादिल । ‘वइगु दिनय् मेगु ग्वाहालि नं यानावनेत जिपिं तयार दु ।’
ज्याझ्वलय् नवासें वीर अस्पतालया निर्देशक डाक्टर केदार प्रसाद सेन्चुरीं वइगु दिनय् नं महानरपालिकाया ग्वाहालि दयाच्वनीगु अपेक्षा दुगु धयादिल ।
प्रसुती गृहया निमित्त निर्देशक डाक्टर सन्दिप पौडेलं नं महानगरपालिकां थज्याःगु अवस्थाय् याःगु ग्वाहालियात च्वछानादिल ।
येँ महानगरपालिकाया अन्तर्राष्ट्रिय सम्बन्ध सचिवालयया अधिकृत यम वस्यालं ल्हासापाखें स्वचालित न्युक्लेइक एसिड एट्राक्सन मेसिन १ थान, थुकी छ्यलीगु रिएजेन्ट ३द्वः थान, पिसिआर मेसिन छगः, भिटिएम ३द्वः थान प्राप्त जूगु जानकारी बियादिल ।
अथे हे, आरडीटी किट ३द्वः थान, डिस्पोजेबल सर्जिकल पञ्जा २५सः थान, मेडिकल मास्क ३द्वः थान, इन्फ्रारेड थर्मोमिटर ३सः व ७५ थान अले पर्सनल प्रोटेक्टिभ इक्युप्मेन्ट (पीपीइ) २६सः थान दु ।
मेगु ज्वलंत महानगर थम्हं हे छ्यलेगु जनस्वास्थ्य महाशाखां न्ह्यथंगु दु ।
Categorized in राष्ट्रिय
