येँ महानगरपालिकां राहत वितरण याइगु
नृपेन्द्रलाल श्रेष्ठ | चौलाथ्व चतुर्थी ११४०,चैत्र १६ गते
येँ माहानगरपालिकां विपन्न, असाहय व न्हिया न्हिथं ज्या याइपि मजदुरीपिनिगु लागत संकलनया ज्या गुलि फत उलि न्ह्यने यकिगु जुगु दु । कोरोना भाइरस (कोभिड—१९) संक्रमणया ग्याचिकु नाप लकडाउन लिपा येँ महानगर दुने वसोवास याना च्वपि विपन्न, असाहय व मजदुरी तयेत राहत वितरणया लागि प्रभावकारी यायेत उगु ज्या याकन हे न्ह्याके त्यःगु दु ।
थौं जिल्ला प्रशासन कार्यालय काठमाडौं, काठमाडौँ जिल्लाका उपलब्ध प्रदेशसभा सदस्यपि व येँ महानगरपालिकाया प्रमुख बिद्यासुन्दर शाक्य, सुरक्षा अधिकारीपि नाप सहलह झ्वलय् प्रमुख शाक्यं राहत वितरणया ज्या प्रभावकारी दयकेगु निति गुलिफत उलि याकन यायेत बः बियादिगु दु ।
भाइरस संक्रमण, व्यवस्थापन नियन्त्रण, राहत तथा सहयोगया लागि एकीकृत व समन्वयात्मक योजनाया विषय सहलह ज्या झ्वलय् मेयर शाक्यं राहत वितरणया ज्या वडाध्यक्ष व वडा समितिया नेतृत्वय् एकद्ववार प्रणालीपाखे यायेगु जुइ धका धयादिगु खः ।
विपन्न, असाहय व न्हिया न्हिथं ज्या याइपि मजदुरी याइपि महानगरवासीपिन्त एकद्ववार नीतिपाखे राहत बिइगु विषय केन्द्रित जुया सहलह जुगु प्रमुख शाक्य धयादिगु खः।
छु न संघ–संस्थां ग्वाहालि यायेगु खःसा जिल्ला प्रशासन कार्यालयपाखे वडाध्यक्ष व वडा समितिया पदाधिकारीपि नाप समन्वय याना जक ज्या यायेगु निर्णय जुगु धका धयादिगु खः । थुकि याना राहत वितरणय् एकरुपता वइगु भलसा न कयादिगु खः ।
प्रमुख शाक्यं हलियकं संक्रमण जुगु इलय् थः थःगु थासं फुगु ग्वाहालि याये माःगुलि न बःबियादिगु दु ।
अथेहे प्रमुख शाक्यं सरकारं तोके याःगु मापदण्ड दुने च्वना कम्तीइ न न्यासः बेड तकया क्वारेन्टाइनया लागि माःगु भौतिक पूर्वाधारया लागि महानगरपालिका तयार दुगु नाप याकन हे थाय् उपलब्ध यानाबिइगु धका धयादिसे थःपिन्स पर्याप्त स्वास्थ्य जनशक्ति मदुगुलि संघीय सरकार नाप ग्वाहालिया अपेक्षा यानागु धका न धयादिगु दु ।
