धुकल येंँ महानगरपालिकापाखें येँ महानगर दुने आःतक १४९ गु सम्पदाया पुननिर्माण व निर्माण यानागु विषयवस्तुयात कःघाना छगू पत्रकार सम्मेलन यासे जानकारी बिउगु दु ।

उगू पत्रकार सम्मेलनय् महानगरपालिकां संस्कृति व सम्पदाया ख्यलय् याना वयाच्वनागु कार्यप्रगतिबारे जानकारी महानगरया मेयर विद्यासुन्दर शाक्यं बियादीगु खः। मेयर शाक्यं थः महानगरय् वये धुंका महानगर दुनेया कला, संस्कृति, सम्पदा संरक्षण तथा प्रवर्द्धनया झ्वलय् आपालं ज्या यानागु उकिइ सफलता नं हासिल यानागु खँ उगु पत्रकार सम्मेलनय् कनादीगु दु।

वयकलं येँ महानगरपालिकां मरुसतः, कमलपुखुया नापनापं ऐतिहासिक महत्वं जाःगु दरबार हाई स्कूल व थीथी वडाय् दयाच्वंगु ऐतिहासिक बहाः बही, मठमन्दिर, चैत्य, विहार, गुथि छेँ, द्यःछें लगायत सत्या स्वयां अप्वः सम्पदाया पुननिर्माण यानागु धका वयकलं छगू धलःपौ नं न्ह्यब्वया दिल।

वयकलं उगु पत्रकार सम्मेलनय् स्थानीय बाजंया  संरक्षण, जात्रापर्व सञ्चालन, बाजागुरुपिन्त हनावना, सांस्कृतिक ज्याखँत यानागु खँ नं कनादिल । वयकलं येँय् दुने जक मखसे स्वनिगलं पिनेया तकं ऐतिहासिक तथा पुरातात्विक महत्वया क्षेत्र लुम्बिनीया बज्रयान महाविहार, रामग्रामया पण्डितपुर क्षेत्रया विकास लगायतय् ज्या यानागु खँया नं जानकारी बियादिल।

थुकथं हे वयकलं सम्पदाया ख्यलय् महानगर पालिकां आपालं ज्या याय्फूगुलिइ थः सन्तुष्ट जुयागु नं खँं कनादिल।

Categorized in राष्ट्रिय