येँ महानगरया अनुदानं प्रसूतिगृह पीसीआर कोरोना परीक्षण याइगु
नृपेन्द्रलाल श्रेष्ठ | गुंलागा ८ ११४०,साउन २७ मंगलवाः
परोपकांर प्रसूति तथा स्त्रीरोग अस्पताल थापाथलीइ वासः यायेगु लागि वइपि सेवाग्राहीपिन्त आः अस्पतालय् हे पीसीआर परिक्षण यायेगु सुबिधा दइगु जुगु दु ।
कोभिड–१९ परिक्षणया लागि अत्यावश्यक पीसीआर ल्याबया थौं छगु अस्पतालया ६१ क्वःगु दँ मुँज्याय् स्वास्थ्य तथा जनसंख्या मन्त्री भानुभक्त ढकाल व येँ महानगरपालिकाया मेयर विद्यासुन्दर शाक्यं मंकाः कथं उगु ल्याबया उलेज्या यानादिगु खः ।
येँ महानगरपालिकां वःगु साउन ४ गते परोपकार प्रसूति तथा स्त्रीरोग अस्पतालय् पीसीआर मेसिन सहित कोभिड–१९ या लागि माःगु स्वास्थ्य सामाग्री हस्तान्तरण याःगु खः ।
उगु अस्पतालय् येँ महानगरपालिका नाप भगिनी सम्वन्ध स्थापित जनवादी गणतन्त्र चीनं तिब्बत स्वशाशित क्षेत्रय् दुगु ल्हासा नगरं अनुदान स्वरुप बिःगु खः । उगु मेसिन नाप पीसीआर ल्याबया थौं मन्त्री ढकाल व मेयर शाक्यं मंका कथं उलेज्या यानादिगु खः ।
उगु ज्याझ्वलय् मन्त्री ढकालं प्रसूति सेवाया लागि विशिष्ठ योगदान बिया वयाच्वंगु थुगु अस्पतालं स्तरोन्नतीया लागि सरकार थप ग्वाहालि यायेत तयार दुगु जानकारी बियादिसे महानगरपालिकां याःगु ग्वाहालिया प्रसंशा न यानादिगु खः ।
येँ महानगरया मेयर शाक्यं महानगरपालिकां नेपाली सेना नाप सहकार्यय् बीरेन्द्र अस्पताल छाउनी मृगौला ल्वगिपिन्त हेमोडाईलासिस सेवा सुरु यानागु न जानकारी बियादिगु खः । ‘महानगरपालिकाया आर्थिक ग्वाहालिं नेपाल एम्बुलेन्स सेवानाप सहकार्य याना लकडाउनया इलय् प्राथमिक व आकस्मिक सेवा बियादिगु न धयादिगु खः,’ मेयर शाक्यं महानगरपालिकां अक्सिजन प्लान्ट स्थापना यायेत गंगालाल हृदय रोग केन्द्र नाप सम्झौता यानागु धका धयादिसे कान्तिवाल अस्पतालय् नाप न सम्झौता यानागु धयादिगु खः ।
महानगरपालिकां प्रसुतीयात पीसीआर मेसिन छगः नाप भिटिएम झींन्यासः गः, आरडीटी झींन्यासः गः व पीपीइ न्यासःपा हस्तान्तरण याःगु खः ।
