येँ महानगरया स्वीनिगुलिं वडाया राजस्व अनलाइनपाखें
नृपेन्द्रलाल श्रेष्ठ | अनलाथ्व द्धादशी ११४०, असोज १२ सोमवाः
येँ महानगरपालिकापाखें विद्युतीय प्रणालीपाखें राजश्व निर्धारण व संकलन याय्गु ज्या न्ह्याकूगु दु ।
राजश्व विभागया निर्देशक शिवराज अधिकारीं असोज १ गतेनिसें अनलाइन सेवा न्ह्याकागु जानकारी बियादिसें शुरुया झिंछन्हुं हे च्यासः व न्यय्म्ह करदातापाखें छगू करोड ख्वीगू लखतका राजश्व म्हःगु जानकारी बियादिल । वय्कलं असोज १३ गतेनिसें स्वीनिगुलिं वडापाखें सेवा शुरु याय्गु नं जानकारी बियादिल ।
अथे हे, येँ महानगरपालिकाया प्रमुख प्रशासकीय अधिकृत एकनारायण अर्याल नं विद्युतीय प्रणालीपाखें राजश्व म्हय्गु ज्या शुरुवात याय्वं सकारात्मक प्रतिकृया वःगु धयादिल । आर्थिक वर्ष २०७७÷७८या नीति व ज्याझ्वलय् हे येँ महानगरपालिकां म्हय्गु कर, सेवा शुल्क व जरिवाना बैंकिङ व विद्युतीय प्रणालीपाखें याय्गु न्ह्यथनागु खँ धयादिसें प्रमुख प्रशासकीय अधिकृत अर्यालं कोभिड–१९या महामारीया दथुइ थुगु प्रणालीया विकास यानाः सकारात्मक ज्या शुरुवात यानागु धयादिल । अनलाइनपाखें राजश्व भुक्तानीया शुरुवातया नापनापं वडाय् सेवाग्राही भीड म्हो जुइगु व सेवा नं प्रभावकारी जुइगु अर्यालया विश्वास दु ।
थ्व हे झ्वलय् फुक्ककथंया कर, राजस्व, दस्तुर व शुल्क भुक्तानी याय्त व थःम्हेस्यां भुक्तानी यानागु धेबाया रसिद काय्त छु छु याय्माः धइगु डेमो छुं दिनय् हे सार्वजनिक याय्गु तयारी येँ महानगरपालिकां यानाच्वंगु दु । थुकिं यानाः करदातापिन्त अझ सहज जुइगु विश्वास महानगरपालिकां काःगु दु ।
