येँ महानगरया ३गू वडाय् विपद् व्यवस्थापन तालिम ज्याझ्वः न्ह्याइगु
लहनान्यूज | गुंलागा त्रयोदशी ११४१, भाद्र २१ सोमबाः
येँ महानगरया वडा १५, १७ व २७ य् ‘समुदायय् आधारित विपद व्यवस्थापन परियोजना’ ज्याझ्वः न्ह्याइगु जूगु दु । जापान सरकार विदेश मन्त्रालयं चूलाकूगु आर्थिक ग्वहालिइ उगु ज्याझ्वः, येँ महानगरपालिका राष्ट्रिय युवा गैरसरकारी संस्था महासंघ, नेपालया सहकार्य परियोजना न्ह्याइगु जूगु खः ।
ज्याझ्वः अन्तर्गत विपद व्यवस्थापन सञ्जाल निर्माण व शशक्तिकरण क्रियाकलाप, प्रकोप जोखिम लिसें प्रभावित क्षेत्रया समुदायपिन्त विपद् व्यवस्थापन सामाग्री वितरण, राहत व पुनस्र्थापना कार्यक्रम, विपद पूर्व तयारीया लागि जागरणमुलक क्रियाकलाप न्ह्याइ । अथेहे नेपाल सरकारं निर्माण याःगु विपद रणनीति योजनायात स्थानीयकरण यायेत ग्वहालि याइ धाःसा नेपाल सरकार व जापान सरकारया अधिकारीपिं दथुई अनुभव कालबिल याई ।
ज्याझ्वया न्हापांगु मुँज्याय् न्ववासें महानगरया उपप्रमुख हरिप्रभा खड्गी श्रेष्ठं भौगोलिक परिस्थिति अनुसार नेपाःया प्राकृति व मनुतय्सं ब्वलंकिगू निगू हे प्रकारया विपत्ति जुइगु जूगुलिं उकियात ज्यंकेगु व म्हो जक क्षति जुइकथं तयारी न्ह्याकेमाःगु धयादिल ।
उगु परियोजना येँ महानगर व सप्तरीया सप्तकोशी नगरपालिकाया वडाय् न्ह्याइगु जुई । परियोजना क्वचाय्धुंका वडाय् समावेशी व लक्षित पुचःपिनिगु उद्धार यायेत समुदायस्तरीय प्रतिकार्य संयन्त्र तयार जुइगु जुई ।
थ्वः ज्याझ्वः अन्तर्गत महानगरया विपद व्यवस्थापन विभाग व सहरी स्वास्थ्य विभागया अधिकारी, परियोजनाया लागि ल्यःगु वडाया जनप्रतिनिधि, विपद व्यवस्थापन स्वयमसेवकयात प्रभावकारी सामुदायिक विपद व्यवस्थापन यायेत क्षमता विकासया तालिम बिइगु जुई ।
जापान अन्तरराष्ट्रिय ग्वहालि ज्याझ्वःया प्रतिनिधि निर्देशक मायुमी योसिदां परियोजनाया कार्यक्षेत्र व क्रियाकलापया विषयस जानकारी बिउसें, थथवेंया अनुभव, ज्ञान व सिपया कालबिलपाखें समुदाययात प्रतिकार्य न्ह्यज्याकेफइगु न्ह्यथनादिल ।
ज्याझ्वलय् योसिदां येँ महानगरपालिका लिसेया सहकार्यपाखें प्रकोप जोखिम व लिच्वः लागू क्षेत्रया समुदायतय्त विपद् व्यवस्थापन सामाग्री वितरण, राहत व पुनस्र्थापना कार्यक्रम, विपद पूर्व तयारीया लागि जागरणमुलक क्रियाकलापय् बाँलागु लिच्वः हयेफइगु धयादिल ।
उगु झ्वलय् भुखाय् ईलय् नालाकायेमाःगु सुरक्षाया प्रयास, छेँपाखें सुरक्षित जुया पिहाँ वय्धुंकाया सुरक्षा, उगु ईलय् सीपिनिगु व्यवस्थापन, घाःपाः जुपिनिगु वासः याय्गु, बास व नयेगु प्रबन्ध गते याना यायेगु ? धैगु विषयस सहलह जूगु खः । भुखाय् लिसें खुसीबाः, धाकूफय्, सतक दुर्घटना, चल, मिं नइगु थें जाःगु घटनाय् व्यवस्थापन समुदायको भूमिकाया विषय सहलह जूगु खः ।
