येँ महानगर दुनेया सामूदायिक स्कूलया छात्रायात सितिकं स्यानिटरी प्याड
नृपेन्द्रलाल श्रेष्ठ | गुंलागा पारु ११४० (श्रावण २० २०७७) मंगलबाः
येँ महानगरपालिका दुनेया सामुदायिक स्कूलय् ब्वनाच्वंपिं छात्रातय्त येँ महानगरपालिकां सितिकं स्यानिटरी प्याड इनीगु जूगु दु ।
ज्ञानोदय माध्यामिक विद्यालय, बाफलय् ब्वनाच्वंपिं छात्रायात सितिकं स्यानिटरी प्याड इनाः थौं थुगु ज्या न्ह्याकूगु खः ।
येँ महानगरपालिका वडा नम्बर–१४ या अध्यक्ष शोभा सापकोटां स्यानिटरी प्याड भेन्डिङ मेसिनय् पायम्वः कुतकाः छगू प्याड लिकयाः छात्रायात लःल्हानादिल ।
ज्याझ्वःया ब्वतिमि छात्रापिन्सं तारन्ताः स्कूलय् थ्यनेधुंकाः नं थी मज्यू जूबलय् प्याड मदयाः छेँय् लिहां वनेमाःगु अनुभव न्यंकुसें स्कूलय् सितिकं प्याड वितरणया व्यवस्था जूगुलिइ लसता प्वंकादिल ।
ज्याझ्वःयात सम्वोधन यासें येँ महानगरपालिकाया मेयर विद्यासुन्दर शाक्यं रजस्वला जूपिं मिसायात विभेद यायेमज्यूगु धयादिल ।
‘छेँय् सुं मिसाया थी मज्यू जुइबलय् उमिगु सुसाःकुसाः यायेमाः, ग्वाहालि यायेमाः धइगु स्कारात्मक पक्ष खः’ शाक्यं धयादिल । ‘तर, प्यन्हु जिगु ज्या यायेगु पाः, वं थी मज्यू धइगु थुज्वःगु विभेदं जाःगु व्यवहारय् ह्यूपाः वयेमाः ।’
स्कूलया प्रधानाध्यापक नातिकाजी महर्जनं छात्राया थी मज्यू जुइबलय् न्हापा यक्व समस्या फयेमाःगु न्यंकुसें थ्व चेतना थनेगु ज्या जूगु धयादिल ।
वय्कलं न्हापांगु चरणय् ५ निसें १२ कक्षातक्क ब्वनीपिं करीब १४सः छात्राया पिरियडयात लिधंसा नालाः १ लख २०द्वः प्याड टेण्डर प्रक्रियाय् वनाः खरिद यानागु जानकारी बियादिल ।
वय्कलं भेन्डिङ मेसिन व डिस्पोजल मेसिन नं न्यानागु जानकारी बियादिल ।
येँ महानगरपालिकाया शिक्षा विभागया शाखा अधिकृत मोती भट्टराईं महानरपालिका क्षेत्र दुनेया दक्वं सामूदायिक स्कूलयात प्रति छात्रा द्वःछि व खुतकाया दरं बजेट निकासा यानाः दक्वं स्कूलय् छ्वयेधुनागु जानकारी बियादिल ।
Categorized in राष्ट्रिय
