येँ व ख्वपय् न खनेदत, देय्न्यंक थप २६म्ह संक्रमित
लहनान्युज | बछलागा षष्ठी ११४०, बैसाख ३१ बुधवाः
५७म्हेसित खनेदुगु कोरोना संक्रमणय् येँ व ख्वपय् न न्हूपिं संक्रमितत खनेदुगु दु । अथे संक्रमण जूपिं येँ छम्ह व ख्वप जिल्लाय् निम्ह जूगु पुष्टि जूगु दु ।
संक्रमितत खनेदुपि येँ १म्ह, ख्वपय् २ म्ह, पर्साय् १८म्ह, महोत्तरीइ २म्ह, धनुषाय् २म्ह व सर्लाहीलय् १म्हेसित संक्रमण जूगु दु ।
स्वास्थ्य तथा जनसंख्या मन्त्रालयय् बिःगु जानकारी कथं येँय् ३३दँया मिसा व ख्वपय् २५दँया मिसा व २७दँया मिजंयात संक्रमण जूगु दु ।
अथेहे पर्सा जिल्लाय् २२, २८, २८, ३२, ४५, ६०दँया मिसात व १६, २२, २४, २५, २५, २८, २८, ३२, ५९, ५५, ६१ व ६१दँया मिजंतय्त संक्रमण जूगु दु ।
नापं महोत्तरी जिल्लाय् १६ व ३५दँया मिजं, धनुषा जिल्लाय् २०दँया मिसा व ४०दँया मिजं व सर्लाहीलय् ४५दँया मिजंयात कोरोनाया संक्रमण जूगु दु ।
नेपालय् मुक्कं संक्रमिततय् ल्याः २१७म्ह थ्यंगु दु ।
