योगेश वैद्यया याकः म्येचाः पिदनीगु
लहनान्यूज | चौलाथ्व चौथी ११३७ (मार्च ३१ २०१७)
वरिष्ठ म्येहालामि भाजु योगेश वैद्यया पुलांगु तर गनं पिमदंनिगु १०पु नेपालभाषाया म्येत छथाय् मुंकाः म्येचाः ‘Forgotten Melodies’ पिदनीगु जूगु दु ।
म्येचालय् दक्व हे म्ये वैद्यं हे हालादीगु दुसा ७पु म्येय् लय् नं वयकलं हे तयादीगु दु । अथे हे म्येचाःया छपु म्ये त्वःताः दक्वं हे म्ये जनकवि दुर्गालाल श्रेष्ठं च्वयादीगु दु ।
म्येचाःया निपु म्येय् धाःसा नातिकाजीं लय् तयादीगु दु । अथे हे भूषणप्रसाद श्रेष्ठं च्वयादीगु छपु म्येय् रीता महर्जनं लय् तयादीगु दु ।
म्येचाः प्लाटिनम स्टुडियोपाखें पिदनेत्यंगु खः । म्येचाःया म्ये मुंकेगु ज्या संगीतकःमि लिसें संचारकःमि रीता महर्जनं यानादीगु खः ।
मेट्रो एफ.एम.या अन्तरङ्ग ज्याझ्वलय् म्येहालामि वैद्यलिसे अन्तर्वाताया झ्वलय् थम्हं वैद्यया पुलांगु म्येया बारे स्यूगु संचारकःमि महर्जनं धयादिल । व हे झ्वलय् थुगु म्येचाःया बिचाः ब्वलंगु महर्जनं लहनान्यूजयात कनादिल ।
रीताया याकः म्येचाः नं पिदनीगु
योगेश वैद्यया याकः म्येचाःलिसें हे म्येहालामि अले संचारकःमि रीता महर्जनया याकः म्येचाः नं पिदनीगु जूगु दु ।
'रीता at her best' नामं पिदनेत्यंगु म्येचालय् दक्वं म्य् मयजु रीतां हे सः बियादीगु दु । थुगु म्येचालय् नं ९पु म्येय् योगेश वैद्यं लय् तयादीगु दुसा २पु म्येय् डा.राममान तृषितं लय् बियादीगु दु ।
थुगु म्येचालय् नं दक्वं म्ये जनकवि दुर्गालाल श्रेष्ठं हे च्वयादीगु दु ।
निचालं म्येचालय् वि.सं. १२ निसें २२ सालतक्क श्रृजना जूगु म्येत दुथ्यानाच्वंगु म्येहालामि महर्जनं कनादिल । म्येचाःया पिकाकः सीतामां संगीत स्मृति कोष खः ।
निचालं म्येचाः वइगु बैसाखया दुने पिथनेगु कथं तयारी जुयाच्वंगु महर्जनं लहनान्यूजयात कनादिल ।
Categorized in मनोरन्जन
