रक्तदाता समाजया स्वक्वःगु महाधिवेशन
लहनान्युज | बछलागा द्धितिया ११३८ (मे २ २०१८)
‘म्ह्वतिं छखा छेँ छम्ह स्वयम्सेवी रक्तदाता अभियानय् ब्वति कायेनु’ धैगु नारा ज्वना न्ह्याःगु नेपाल स्वयंसेवी रक्तदाता समाजया स्वक्वःगु राष्ट्रिय महाधिवेशनया ज्ुगु दु ।
समाजया नायः प्रेम सागर कर्माचार्यया नायःसुइ न्ह्यागु उगु ज्याझ्वलय् मूपाहाँ कथं नेकपा माओवादीया नायः पुष्पकमल दाहाल ‘प्रचण्ड’ झायादीगु खः ।
प्रा.डा. युवराज शर्मां लसकुस न्वचू तयादीगु उगु ज्याझ्वलय् विशेष पाहां कथं देव रत्न धाख्वा, पाहाँ कथं झायादीपिं दुर्गा पाठक, डा. भगवान कोइराला, राजकुमार महत्तोपिसं न्वचू तयादीगु दु ।
न्वचू तयेगु झ्वलय् डा. कोइरालां नेपालय् हिदान याइपिं यक्व दयानं उचित व्यवस्थापन जुइमफुगुलिं इलय् हि उपलब्ध मजुयाः बिरामीत सिनाच्वंगु स्वयेमालाच्वंगु व अतिकं पिडादायक खँ फयेमाला च्वंगु धैगु तसकं हे दुःखया खँ खः । अथेजुया ब्लड बैंक बिइगु पार्ट टाइम सर्भिसथें मखु होल टाइमर थें जुयाः हि यागु माग जुइवं हे बिरामीयात उग्रिमय् हे उपलब्ध याके फयेमाः धैगु खँ तयादिल ।
म्ह्वतिं छखा छेँ छम्ह स्वयम्सेवी रक्तदाता दयेकेगु तातुना न्ह्याकेत्यंगु अभियानय् रक्तदाता समाजसेवी प्रेम सागर कर्माचार्यया म्ह्याय् मय्जु पलिभसा जः आचाजुं न्हापां हि दान यानादीगु दु ।
उगु ज्याझ्वलय् ‘स्वस्थ्य हि सकसिगु नितिं’ धैगु नारा न्ह्यब्वसे हि नाप स्वपू दुगु ‘‘हाम्रो रगत’’ नांगु विशेषाङ्क सफू पितब्वज्या नं जूगु दु ।
हिया महत्व गुलितक्क जुइ धैगु जनयुद्धया इलय् नापं थःथितिपिन्त हिया आवश्यकता जूगु इलय् थःपिन्सं भोगेयानागु पीडा लुमंकुसें प्रमुख अतिथि दाहालं हिया व्यवस्थापनया नितिं पार्टीया नायः व सरकारय् दुगु हैसियतं थम्ह फक्व पहल यायेगु प्रतिबद्धता प्वंकादिल ।
रक्तदातापिन्सं न सें मन सें दान याःगु हिया सही उपयोग मजुसें करिब ४० प्रतिशत हि सितिं वंकाच्वंगु दु, रक्तदातापिन्सं थःगु हि धलय् वांछ्वयेगु नितिं मखु मनुतय्गु ज्यान बचेयायेया नितिं ब्यूगु खः । तर सरकारी निकाय्नं हियानितिं मखु उगुंथुगुंं शिर्षकय् दातापाखें सितिकं ब्यूगु हियानं शुल्क कयाच्वंगुलिइ आपत्ति प्वंकुसे यदि सरकारं निशुल्क व्यवस्था यायेहे मफुगु खःसा थुकिया व्यवस्थानं रक्तदातापाखे ंहे यायेगु खँ नं समाजया नायः कर्माचार्यं न्ह्यथनादीगु दु ।
बुखँ÷किपा ः राजेन्द्र रञ्जित
Categorized in राष्ट्रिय
