रत्नपार्कया नां हिले मज्युगु खःला ?
नृपेद्रलाल श्रेष्ठ
पुलांगु रत्नपार्क धयातःगु थासय् शंखधर व पद्मरत्नया झ्वाता उलेज्या जूगुलिसें थुगु थाय्या नांया खँ नं तसकं बय्बय् जूगु दु । थुगु थाय्या नां शंखधर उद्यान तल धकाः छपुचलं पुलांगु नां हिलेदइमखु धकाः विरोध क्यन । उलि जक मखु, रत्नपार्क नांयात हे कायम मयाय्गु खःसा कडा आन्दोलन याय्गु तकंया ख्याच्वः बियाच्वंगु दु । छगू खँ ला पक्कां खः, थाय्बाय्या पुलांगु मौलिक नां हिलेमज्यूगु ख हे खत ।
तर आः रत्नपार्कया नां हिलेमज्यू धयाच्वंगु पुचलं निगू, स्वंगू न्ह्यसःया लिसः बीमाःगु नं जूगु दु । छु रत्नपार्क हे थुगु थाय्या पुलांगु नां खः ला ? थुगु थाय्या नां जुजु महेन्द्रया जहानया नामं तय् न्ह्यः छुं हे नां मदुगु ला ? अले मेगु न्ह्यसः स्वनिगःया उलिमछि थाय्या नां हिलाब्यूगु मखंगु खः कि रत्नया नां जक महत्वपूर्ण खः ?
आः रत्नपार्क धयाच्वंगु थाय् न्हापा तिंख्यःया हे छगू ब्व खःसा थुगु थाय्या नां नं तिंख्यः हे खः । तिंख्यःयात जुजु महेन्द्रया जहान रत्न राज्यलक्ष्मीया नामं रत्नपार्क धाःगु खः । थुगु नां अप्वः प्रचलनय् वःगु धइगु अन बसस्टप जूगु ल्याखं हे खः । मिनि बस, माइक्रोबसया सहचालकत रत्नपार्क, रत्नपार्क धकाः हालीगु जूबलय् थुगु नां अप्वः म्हसियावन । उकिया नापं रत्नपार्कलिसे बदनाम म्हसिका तकं स्वानाच्वंगु दु ।
रत्नपार्क धालकि हे यौन धन्दा याइपिं मिसात मुनीगु थाय् धकाः अप्वःसिनं धाय्गु याः । समाजं बियातःगु नांयात शक्तिया बलय् हिलाः थः परिवारया नां ब्यूबलय् अनया पुलांगु इतिहास हुयावंगु ला द हे दु । उगु थाय्या नां रत्नपार्क धाय्गु याःबलय् उगु थाय् नं तिंख्यःया ब्व खः धकाः आःया पुस्तां मसिल । मौलिक हिलेमज्यू, पुलांगु नां हे कायम याय्मा धाय्गु हे खःसा ला तिंख्यः कायम याय्माः धाय्माःगु खः । नकि ४०दँ, ५०दँ न्ह्यःतिनि शक्तिया बलं लादे याःगु नां कायम याय्माः धकाः धाय्गु ।
राजसंस्थाप्रति आस्था तइपिनि बागू शताब्दिया हे ईतिहास मदुनिगु नां उलि यःसा थन सलंसः दँ पुलांगु नां दक्वं न्हंकाछ्वःबलय् थनया आदिवासीतय् गुलि नुगलय् स्याः जुइ धकाः नं बिचाः याय्माःगु खः । भ्याःचाया छ्यं हे दुगु धकाः विश्वास यानातःगु भ्याःचाद्यःयात भ्याःचिया न्यकूया जक नां बियाः भेडासिंह धाःगु सुनां मखं, फिब्व अजिमालिसे स्वानाच्वंगु थाय्यात छगू फिल्मया नामं माईतीघर धालं व हे नां स्वीकार्य । आः शक्तिया दम्भ क्यनाः पुलांगु नां हुयाः छम्ह राजपरिवार दुजःया नां बियातःगु थाय्यात राष्ट्रिय विभूतिया नां बिलं विरोध याय्माःगु कारण छु दु ? शंखधर उद्यान नामय् स्वनिगःया आदिवासीतय् अपनत्व खंकूगु खनेदु ।
प्रतिपक्षी दल दुनेयापिं नं आपालं नेवाःतय्सं रत्नपार्क धयाच्वंगु थाय्यात शंखधर उद्यान नां ब्यूगु ज्यायात लसकुस याःगु दु । आम सर्वसाधारणलिसें अभियन्ता आपाःनिसें शंखधर उद्यान नांयात लसकुस यासें सामाजिक संजालय् येँ महानगरपालिकाया थुगु ज्यायात च्वछाःगु दु । आः राजसंस्थाप्रति
भक्तिभाव जक तयाः शंखधर उद्यानया नांया विरोध याय्गु धइगु जनमतया अपमान खः कि मखु धकाः रत्नपार्क हिमायतीतय्सं बिचाः याय्माःगु खः ।
हरेक खँयात राजनीतिक मुद्दा दय्काच्वने आवश्यक मदु । दक्वं राजनीतिक दलतय्सं ज्वनेमाःगु मुद्दा धइगु जनताया मुद्दा खः । तर थन आपाःथे राजनीतिक दलत थःथःगु स्वार्थय् जक तक्यनाच्वंगु दु । जनतायात रत्नपार्क यः कि शंखधर उद्यान यः व स्वयाः राजनीतिक दलं नवाय्माःगु खः ।
तर सत्तापक्ष, प्रतिपक्ष दक्वसिनं धइथें शंखधर उद्यान नांयात लसकुस यासें लसता प्वंकाच्वंगु इलय् राजसंस्थाप्रतिया भक्तिभाव जक क्यनेगु ज्यां थुगु दल धयागु जनताप्रति गुलि उत्तरदायी खः, गुलित जिम्मेवार खः धकाः लनेगु अमू नं जुयाच्वंगु दु । थुपिं जनताया स्वार्थय् न्ह्याःवनीगु दल खःकि मेगु छुं स्वार्थय् वनीगु दल खः धकाः स्वय्त तकं लँ ब्यूगु दु । अथेजुयाः विरोधया नामय् विरोध याय्गु मखु, जनताया भावना स्वयां पलाः न्ह्याकूसा दलतय् भविष्य नं बांलाइ । छुं छगू परिवार विशेषलिसे स्वाःगु ईतिहास स्वयां, देय्लिसे स्वाःगु ईतिहास, म्हसिकायात स्वीकार याय्त मछालेमाःगु छुं मदु ।
