भारत, अमेरिका व बेलायतया लागिं प्रस्तावित राजदूततय् नां संसदीय सुनुवाइ समितिं अनुमोदन याःगु दु ।

संसदीय सुनुवाइ समितिइ सांसदतय् न्ह्यसःया लिसः बीधुंकाः भारतया लागिं प्रस्तावित राजदूत डाक्टर शंकर शर्मा, अमेरिकाया लागिं प्रस्तावित राजदूत श्रीधर खत्री व बेलायतया लागिं प्रस्तावित राजदूत ज्ञानचन्द्र आचार्यया नां सर्वसम्मतं अनुमोदन याःगु खः ।

थ्वयां न्ह्यः सुनुवाइया झ्वलय् सांसदतय्सं बेलायतया लागिं प्रस्तावित राजदूत ज्ञानचन्द्र आचार्ययात गोर्खा सैनिकतय् अधिकारया पक्षय् ज्या यायेत इनाप यानादिल । सांसदत सुरेन्द्र पाण्डे व देव गुरुङलिसें नं बेलायती सेनाय् ज्या यानाच्वंपिं व सेवा निवृत्त नेपाली नागरिकया ज्वलिंज्वः पेन्सनलिसेंया समस्या ज्यंकेत इनाप यात ।

अथे हे, सांसद भीमसेनदास प्रधानं बेलायती प्रधानमन्त्रीयात नेपाल भ्रमण याकेगु विषययात प्राथमिकताय् तयेत इनाप यानादिल । सांसद जितेन्द्रनारायण देवं थीथी देशय् दुपिं नेपाली दूतावास व नियोगतय् ज्या अनुगमन यायेत संसदीय संयन्त्र माःगु धयादिल ।

संसदीय सुनुवाइया झ्वलय् अमेरिकाया लागिं प्रस्तावित नेपाली राजदूत श्रीधर खत्रीं मिलेनियम च्यालेन्ज कर्पोरेसन (एमसीसी) यात इन्डो प्यासिफिकलिसे स्वायेगु गलत जूगु धायदिल । थुकी नेपाल व अमेरिका निखें हे भ्रम न्यंकातःगु वय्कःया धापू खः ।

खत्रीं एमसीसी विकासया लागिं वःगु अनुदान खःगु व संसदं पास यायेमाः धकाः नेपालया हे कानुन मन्त्रालयं धाःगु धयादिल । अमेरिकी सहायकमन्त्रीं नं एमसीसी इन्डो प्यासिफिक रणनीति अन्तर्गत लाः धाःगुलिं भ्रम न्यंगु वय्कःया जिकिर खः ।

भारतया लागिं प्रस्तावित राजदूत डाक्टर शंकर शर्मां भारतलिसे सहकार्य यासें थवंथवय् हितया लागिं न्ह्याःवनेत न्हापां विश्वासया लकस, निगूगु रणनीतिक व स्वंगूगु अल्प, मध्य अले दीर्घकालीन योजना दयेकाः न्ह्याःवनेगु जानकारी बियादिल ।

Categorized in राष्ट्रिय