२०७७ माघ ५, सोमबार

राजस्थानं चेन्नाईयात १६ रन बुकल

मिलन कुमार | अनलाथ्व सप्तमी ११४०,असोज ७ बुधवाः

चेन्नाई सुपर किंग्सयात राजस्थान रोयल्सं इन्डियन प्रिमियर लिग (आईपीएल) २०२० य् शानदार सुरुवात याःगु दु ।
 
म्हिगः मंगलवाः बहनि जुगु कासाय् राजस्थानं चेन्नाईयात १६ रन बुकुगु दु । सन् २००८ या न्हापागु संस्करणया च्याम्पियन राजस्थानं १३ क्वःगु संस्करणय् बालाक्क सुरुवात याःगु दु ।
न्हापागु कासाय् साविक विजेता मुम्बई इन्डियन्सयात बुकुगु खः चेन्नाई न ।
 
राजस्थान बिःगु २१७ रनया लक्ष्य चेन्नाई न २० ओभरय् ६ विकेट गुमे याना २०० रन जक दयेके फुगु खः । चेन्नाईया लागि फाप डु प्लेसिसं दकलय् अप्वो ७२ रन दयेकुगु खः । । अथेखे मेपि कासामि शेन वाट्सनं ३३ रन, कप्तान महेन्द्र सिंह धोनीं अविजित २९ रन दयकुगु खः ।
 
राजस्थानया लागि राहुल तेवाटिया स्वगु विकेट काःगु खः ।
 
शारजहाँय् टस बुया न्हापागु ब्याटिङ याःगु राजस्थानया लागि कप्तान स्टिभ स्मिथ व सन्जु सामसनया अर्धशतकया ग्वाहालिं ७ विकेटय् २१६ रन दयेकुगु खः ।
 
टी–२० य् डेब्यु याम्ह ओपनर यजश्वी जैसवाल ६ रन दयका आउट जुगु खःसा स्मिथ व सामसनं १२१ रनया साझेदारी याःगु खः । सामसनं ७४ रन, स्मिथं ४७ बलय् ६९ रन दयेकुगु खः ।
 
राजस्थानया लागि २०० रन कटे यायेगु लागि फास्ट बलर जोफ्रा आर्चरं लिपागु इलय् विष्फोटक ब्याटिङ यासे ८ बलय् ४ छक्का ग्वाहालि अविजित २७ रन दयेकुगु खः । चेन्नाईया साम करनं ३ विकेट काःगु खः।
Categorized in कासा