राजोपाध्याय समाजया न्हूम्ह नायः संजय
लहानान्युज | कौलाथ्व तृतिया ११४०,कार्तिक ३ सोमवाः
स्वनिगःया आदिवासी द्यःब्रम्हू राजोपाध्यायतय् कुसा संगठन राजोपाध्याय समाजया न्हूम्ह नायकय् कलाकार संजय शर्मा राजोपाध्याययात ल्यःगु दु । वंगु शन्चरबाः क्वचाःगु समाजया न्हय्क्वःगु दँमुँज्या व स्वक्वःगु तःमुँज्यां वय्कःयात समाजया न्हूम्ह नायकय् निर्विरोध ल्यःगु खः ।
व हे कथं स्वक्वःगु तःमुँज्यां ल्यःगु न्हूगु ज्यासना पुचलय् न्वकू रचना शर्मा राजोपाध्याय च्वनादीगु दुसा मू छ्यान्जेय् पत्रकार बिराजकाजी राजोपाध्याययात ल्यःगु दु । व हे कथं छ्यान्जेय् वन्दना राजोपाध्याय, दांभरिं उद्धव आचार्य राजोपाध्याय, ल्यू दांभरिंलय् चेतनादेवी शर्मा राजोपाध्याय च्वनादीगु दु ।
१३म्ह दुजः दुथ्याःगु ज्यासना पुचःया मू दुजः पदय् विजय शर्मा राजोपाध्याय, विरु सुवेदी राजोपाध्याय, सुजित राजोपाध्याय, श्रीमणी राज शर्मा राजोपाध्याय, रक्षण राजोपाध्याय, महेश बाबु शर्मा राजोपाध्याय व गिरिश शर्मा राजोपाध्याय दी ।
नायः ल्ययेधुंकाः नुगः खँ तयेगु झ्वलय् न्हूम्ह नायः संजयं समाजयात छधी छप्पँ दयेकाः समाजया सर्वाङ्गिण विकासया लागिं निरन्तर न्ह्यानाच्वनेगु प्रतिवद्धता प्वंकादिल ।
वयां न्ह्यः तःमुँज्याया उद्घाटन सत्रय् नेवाः देय् दबूया नायः नरेश ताम्रकारं राजोपाध्याय खँग्वलं स्वनिगःया नेवाःतय् गुरु पुरोहित कथं म्हसिका दुपिं द्यःब्रम्हूतय्गु विशिष्ट पहिचान कुबियाच्वंगु धासें सकल द्यःब्रम्हूतय्सं मेमेगु थर च्वःसां राजोपाध्याय नं तयेमाःगु खँय् बः बियादिल ।
अथे हे नेवाः न्ह्यलुवा लिसें मानवअधिकारवादी नेता मल्ल के. सुन्दरं द्यःब्रम्हू समाजयाके वाचन कला दुगु खँ न्ह्यथँसें थुगु हे कलायात व्यावसायिकीकरण यानाः आर्थिक उन्नतीपाखे न्ह्याःवनेमाःगु खँ कुलादिल ।
उगु हे ज्याझ्वलय् संक्रमणया जोखिमय् अग्रपंक्तिइ दनाः विरामीया वासः यायेगुलिइ खटेजुयाच्वंपिं राजोपाध्याय चिकित्सक, स्वास्थ्यकर्मीतय् सम्मानय् म्येया भिडियो नं क्यंगु खः । अमरराज शर्मां च्वयाः लय् तयादीगु लिसें अमरराज व रत्नशोभा महर्जनं हालादीगु उगु म्येया भिडियोस संक्रमणया अवस्था क्यनेगु लिसें वासः यायेगुलिइ खटेजुयाच्वंपिं राजोपाध्याय स्वास्थ्यकर्मी व चिकित्सकपिनिगु किपा दुथ्याकातःगु खः ।
लिसें महामारीया अवस्थाय् भौतिक रुपं उपस्थित याकाः सम्मान यायेमखंगु धासें थुगुसी एसईई पास जूपिं राजोपाध्याय विद्यार्थीपिनिगु सम्मान कथं विद्यार्थीतय् किपा ब्वयाः नां घोषणा याःगु खः ।
ज्याझ्वलय् राजोपाध्याय चिकित्सक व स्वास्थ्यकःमिलिसें एसईई पास जूपिं विद्यार्थीतयत लिपा ई स्वयाः भौतिक रुपं उपस्थित याकाः सम्मान यायेगु जानकारी ब्यूगु खः ।
संक्रमणया जोखिमया कारणं समाजं थुगुसी जुममार्फत भर्च्युअल रुपं ज्याझ्वः याःगु खः ।
Categorized in राष्ट्रिय
