राम शेखरया ‘सिमात फफ स्वः’ पितब्वज्या
लहनान्युज | चिल्लागा नवमी ११३८ (मार्च ११ २०१८)
मदुम्ह हास्यब्यंग्य कलाकार राम शेखर नकःमिया कृति ‘सिमात फफ स्वः’ नेपालभाषा व खसभाषा निगुलिं भाषं छगू हे सफुतिइ बाखं मूनाया पितब्वज्या शनिवाः ख्वपय् तलेजु बांय्क्वेतय् जूगु दु । राम शेखर नकःमि ग्वाहालि पुचःया ग्वसालय् जुगु उगु ज्याझ्वलय् मूपाँहा नेपालभाषा एकेदेमिया चान्सलर चित्तरञ्जन नेपालीं सफू पितब्वज्या यानादीगु खः ।
साहित्यया विकास यायेत अनुवादया नं भूमिका दइगु खँ मूपाहाँ चित्तरञ्जनं कनादिल । थुगु सफू नेपालभाषं न्हापा नं पिदने धुंकूगु खः, तर खसभाषं अनुवाद यानाः निगुलिं भाषं निगूगु संस्करण कथं पिदंगु खः ।
मुँज्या नायः नरेन्द्र भक्त हाडां मदुम्ह साहित्यकार राम शेखर नकःमियात ग्वाहालि यायेत दयेकूगु ग्वाहालि पुचलं आः साहित्यिक व सांस्कृतिक योगदानया निति ज्या याइ धयादिल ।
महेन्द्र गोपाल कर्माचार्यं न्ह्याकादीगु ज्याझ्वलय् कृष्ण भक्त बोडें लसकुस न्वचू तयादीगु खःसा कृष्ण प्रजापतिं सुभाय् न्वचू तयादीगु खः । पाहाँ कथं तिलक प्रसाद कायस्थ, आशा काजी थकू झायादीगु खः ।
ओम चरण अमात्य, त्रिरत्न शाक्य, गोविन्द मान श्रेष्ठ, धु्रव मधिकःमि, अगिव बनेपाली, केवल प्रकास कायस्थ, कृष्ण प्रजापतिपिसं मंकाः कथं भाय् हिलादीगु खः । प्रदिप रत्न शाक्यं भाय् हिलादीपिनिगु म्हसीका न्ह्यब्वयादीगु खः ।
अथेहे न्वचू तयेगु झ्वलय् पाहाँ कथं झायादीम्ह मल्ल के सुन्दरं राम शेखर छम्ह कलाकार, साहित्यकार, निर्देशक जक मखु मार्कसिजमया आधारय् च्वइम्ह यथार्थवादी क्रान्तिकारी च्वमि नं खः धका धयादिल ।
बुखँ नेवाः सूचना केन्द्र
किपा राजेन्द्र रञ्जित
Categorized in राष्ट्रिय
