निर्वाचन आयोगं राष्ट्रपति चुनावया कार्यतालिका सार्वजनिक याःगु दु । 

 

येँया कान्तिपथय् च्वंगु आयोगया ज्याकुथी थौं च्वंगु पदाधिकारीतय्गु मुँज्यां थ्वहे वइगु फागुण २९ गते सुथसिया १०ताः इलंनिसें ३ताः ईतक मतदान जुइकथं चुनावया कार्यतालिका सार्वजनिक याःगु खः ।

 

प्रधानमन्त्री नापं राजनीतिक दलया प्रतिनिधितलिसे माःकथं परामर्श व सहलह यानाः चुनावया तिथि क्वःछ्यूगुु आयोगं न्ह्यथंगु दु । सरकारलिसेया समन्वयस निर्वाचन आयोगं राष्ट्रपतिया चुनावया तिथि क्वःछीगु व्यवस्था राष्ट्रपति व उपराष्ट्रपतिया चुनाव सम्बन्धि ऐनय् न्ह्यथनातःगु दु ।

 

 

आयोगं फागुण २१ गते मतदाताया नांधलः पिथसें उगु हे दिनया सनिलया ६ताः ईतक मतदाताया नांधलखय् त्वःफ्यूगु दुसा दुथ्याकेगु नापं विवरण भिंकेत दरखास्त बीत व दावी विरोध यायेफइगु न्ह्यथंगु दु । २३ गते १०ताः इलंनिसें न्हिनसिया २ताः ईतक उम्मेदवारयात मनोनयन दर्ता यायेगु ई फ्यानातःगु आयोगं उगु दिनया ३ताः इलय् उम्मेदवारया नांधलः पिथनीगु जुइ ।

 

२४ गते २ताः ईतक दावी विरोधया उजुरी बीफइगु न्ह्यथसें आयोगं उगु दिनया २ताः इलंनिसें ३ताः इतकया दुने वःगु उजुरीयात कयाः छानबीन यायेगु व उम्मेदवारीया नांधलः पिथनेगु आयोगया कार्यतालिकाय् न्ह्यथनातःगु दु । उम्मेदवारयात नां लित कायेगु नितिं २४ गते सनिलया न्याताः त्या दुने याय्माः । आयोगं उगु दिनया ६ताः इलय् लिपांगु नांधलः पिथनेगु न्ह्यथंगु दु ।

 

 

राष्ट्रपतिया चुनाव प्रयोजनया नितिं संघीय संसदया दुजः व प्रदेशसभाया दुजः मतदाता दुुगु निर्वाचन मण्डल दइगु उगु ऐनया दफा ३ य् न्ह्यथनातःगु दु ।

 

 

चुनाव येँय् हे जुइगु नं आयोगं न्ह्यथंगु दु । राष्ट्रपतिया चुनावय् राष्ट्रिय सभाया ५९म्ह, प्रतिनिधिसभाया २सः व ७५म्ह व प्रदेशसभाया ५सः व ५०म्ह सांसदतय्सं मतदान याइ 

Categorized in राष्ट्रिय