राष्ट्रिय सभापाखे फागुन २० गतेनिसें खाली जुइगु १९गू पदया नितिं कन्हय् निर्वाचन जुइत्यंगु दु । इपिं पदय् ४३म्हेसिनं उम्मेदवारी ब्यूगु दु ।

राष्ट्रिय सभा निर्वाचनय् सत्ता गठबन्धनय् दुगु न्यागू दल गठबन्धन हे दयेकाः चुनावी मैदानय् दु । इमिसं निर्वाचनया नितिं पद इनेज्या यायेधुंकूगु दु । नेकपा एमालें धाःसा न्ह्येगुलिं प्रदेशय् थः उम्मेदवार न्ह्यज्याकूगु दु ।

फागुन २० गतेनिसें राष्ट्रिय सभाय् खाली जुइगु १९गू पदमध्ये ८गू पद एमालेपाखें खाली जुइ । निर्वाचन आयोगं ७म्ह मिसा, ३म्ह दलित, २म्ह अपांगता जूपिं व अल्पसंख्यक अले ७म्ह मेमेगु थीथी पुचः यानाः १९गू सिटया नितिं निर्वाचन याकेत्यंगु दु ।

निर्वाचनया नितिं न्ह्येगुलिं प्रदेशय् यानाः ४३म्ह उम्मेदवारपिन्सं उम्मेदवारी ब्यूगु आयोगं धागु दु । उकिमध्ये नेकपा एमालेपाखें १९म्ह, नेपाली कांग्रेसं ६म्ह, नेकपा माओवादी केन्द्रपाखें ५म्ह, नेकपा एकीकृत समाजवादीं ५म्ह, जनता समाजवादी पार्टी, नेपालं २म्ह, राष्ट्रिय प्रजातन्त्र पार्टीं २म्ह, नेपाल मजदुर किसान पार्टीपाखें २म्ह, लोकतान्त्रिक समाजवादी पार्टीपाखें १म्ह अले राष्ट्रिय जनमोर्चां १म्हेसिया उम्मेदवारी लाःगु दु ।

गठबन्धनय् दुपिं दलदथुइ जूगु सहमतिकथं एमालें त्याकूगु ८गू सिटय् कांग्रेसयात ३गू, जसपायात २गू, माओवादी केन्द्र, एकीकृत समाजवादी व जनमोर्चायात १÷१गू सिट चूलाइगु यानाः भाग इनेज्या याःगु दु । १९गू सिट खाली जुइबलय् भागबन्डाय् कांग्रेसया भागय् ६गू सिट, माओवादी केन्द्र व नेकपा एसयात ५÷५गू सिट अले जसपायात २गू व जनमोर्चायात छगू सिट चूलाइ ।

५९म्ह दुजःया राष्ट्रिय सभाय् आः नायःनाप एमालेया २४म्ह, न्वकूनाप माओवादीया १४म्ह, कांग्रेसया ७म्ह, एकीकृत समाजवादीया ७म्ह, जसपाया निम्ह, लोकतान्त्रिक समाजवादीपाखें छम्ह, स्वतन्त्र छम्ह अले मनोनित स्वम्ह दुजः दु ।

निर्वाचनय् स्थानीय तहया द्वछि ४सः व ९३म्ह अले प्रदेश सभाया ५सः व ३२म्ह यानाः जम्मा २द्व व २५म्ह मतदाता दु । निर्वाचनय् प्रदेश सभा दुजःया मतभार ४८क्व गाउँपालिका व नगरपालिका प्रमुख व उपप्रमुखया मतभार १८क्व जुइ ।

 

Categorized in राष्ट्रिय